चाडपर्वका बेला भिडभाड बढी हुने भएकाले तोकिएभन्दा बढी मूल्य लिएको फेला परे तत्काल ट्राफिक प्रहरीसमक्ष उजुरी गर्न निर्देशक खतिवडाले यात्रुलाई आग्रह गर्नुभयो । नेपाल यातायात व्यवसायी राष्ट्रिय महासङ्घका अध्यक्ष सरोज सिटौलाले बसपार्क, चाबहिल, बल्खु, कोटेश्वर लगायतका तोकिएका ठाउँबाट यात्रुले टिकट काट्न सकिने जानकारी दिनुभयो ।

विगतका वर्षमा १८ लाखदेखि २० लाखसम्म यात्रु दसैँ मान्न गाउँ जाने गरेकामा यसपालि भने १५ लाखको हाराहारीमा उपत्यका बाहिर जाने अनुमान गरिएको सिटौलाले जानकारी दिनुभयो । “भोटेकोशीको बाढीले धेरै सवारीसाधन बगाएको र चालक बेपत्ता भएकाले शोकको अवस्थामा छौँ,” सिटौलाले भन्नुभयो, “अझै पनि ठाउँ ठाउँका सडक बिग्रेकाले सुक्खा पहिरो गइरहेकाले पनि यात्रा जोखिमपूर्ण छ ।”

पानी नियमित परिरहेकाले सुरक्षाको दृष्टिकोणले जोखिमपूर्ण यात्रा रहेकाले जानैपर्ने यात्रुबाहेक अरूलाई नजानसमेत सिटौलाले आग्रह गर्नुभयो । महासङ्घका अनुसार नागढुङ्गा, कोटेश्वर, बल्खु र टोखा रुटबाट सवारीसाधन उपत्यका बाहिर जाने छन् ।

यात्रुलाई सुरक्षित बनाउन यस पटक सवारी सञ्चालनमै कडाइ गर्ने निर्णय गरिएको छ । महासङ्घका अनुसार लामो दुरीका सवारीसाधनमा अनिवार्य रूपमा दुई जना चालक राख्नुपर्ने र टिकट काउन्टरमा बस्ने कर्मचारीले अनिवार्य रूपमा परिचयपत्र र युनिफर्म लगाउनुपर्ने, टिकट काट्दा यात्रुको नाम र सम्पर्क नम्बर अनिवार्य रूपमा अभिलेख राख्नुपर्ने व्यवस्था गरिएको छ ।

दसैँतिहारको समयमा नयाँ बसपार्कसहित विभिन्न टिकट काउन्टरमा यात्रुको भिड अत्यधिक हुने भएकाले सुरक्षाकर्मीको परिचालन पनि बढाइने भएको छ । यस्तै यात्रुको सहजताका लागि १४ वटा नागरिक सहायताकक्ष सञ्चालन गरिने भएको छ ।

महासङ्घका अनुसार अग्रिम टिकट बिक्री, चालक व्यवस्थापन, यात्रुको विवरण अभिलेखीकरण र सुरक्षा व्यवस्थालाई एकसाथ अघि बढाएर दसैँको यात्रालाई सुरक्षित तथा व्यवस्थित बनाउने तयारी गरिएको छ ।

यस्तै सुरक्षित यात्रा र राजमार्गमा हुने अवरोध वा दुर्घटनाको तत्काल जानकारी आदानप्रदान गर्न केन्द्रीय सूचना केन्द्र सञ्चालनमा ल्याइने महासङ्घले जनाएको छ । सम्पूर्ण यात्रुवाहक सवारीसाधनमा प्राथमिक उपचार सामग्री, अग्नि नियन्त्रण उपकरण र पिउने पानीलगायतका अत्यावश्यक सुविधा अनिवार्य रूपमा उपलब्ध गराउनुपर्ने निर्णय भएको महासङ्घले जनाएको छ ।