‘आ बाट आमा २’को दसैं गीत ‘रातो टीका लाउँदा क्या दामी देखियो’ सार्वजनिक

नमस्ते चितवन

बिहिबार, असोज २२, २०८३ मा प्रकाशित

काठमाडौं । चलचित्र ‘आ बाट आमा २’मा समावेश नयाँ गीत ‘रातो टीका लाउँदा क्या दामी देखियो’ सार्वजनिक गरिएको छ । चलचित्रको प्रचारप्रसारलाई लक्षित गर्दै निर्माण टिमले बिहीबार गीतको भिडियो युट्युबमार्फत सार्वजनिक गरेको हो ।

दशैंको माहोल र टीका–जमरा लगाउने संस्कृतिलाई प्रस्तुत गरिएको गीतको भिडियोमा पल शाह, मलिका महत, आकाश श्रेष्ठ, साइग्रेस पोखरेल, रिश्ता गुरुङ, निकिता आचार्यलगायत कलाकार सामूहिक नृत्यमा रमाइरहेको देख्न सकिन्छ । लाहुरेको भूमिकामा रहेका सविन श्रेष्ठलाई पनि भिडियोमा प्रस्तुत गरिएको छ ।

सामूहिक विवाहको प्रसंगमा कलाकारहरूको नृत्य प्रस्तुत गरिएको गीतको भिडियो आकर्षक देखिन्छ । गीतको कोरियोग्राफी गम्भीर विष्टले गरेका छन् ।

गीतमा बाबुल गिरीको शब्द तथा संगीत रहेको छ भने बाबुल गिरी र रचना रिमालले स्वर दिएका छन् ।

चन्द्र पन्तको कथा, पटकथा तथा निर्देशन रहेको चलचित्रमा पल शाह, मलिका महत, विपना थापा, रिश्ता गुरुङ, निकिता आचार्य, आकाश श्रेष्ठ, सविन श्रेष्ठ, प्रदीप रावत, साइग्रेस पोखरेल, गजित विष्ट, नरेन खड्का, दिलिप अखेडालगायत कलाकारको मुख्य भूमिका छ ।

चलचित्रको लेखनमा रोशन भट्ट र चन्द्र पन्तले सहकार्य गरेका छन् भने संवाद रोशन भट्टको रहेको छ । करण सिंह चलचित्रका प्रोडक्सन एक्जिक्युटिभ हुन् ।

नवराज उप्रेतीको छायांकन रहेको चलचित्रमा बाबुल गिरीको संगीत, गम्भीर विष्टको नृत्य निर्देशन तथा साहिल खान र मिलन श्रेष्ठको सम्पादन रहेको छ । ओएसआर डिजिटल चलचित्रको डिजिटल पार्टनरका रूपमा जोडिएको छ भने आरआर फिल्म्सले नेपालभर वितरणको जिम्मेवारी लिएको छ ।