हिल्सामा खाद्यान्न र उपचारको अभाव, हिउँले सडक अवरुद्ध हुँदा नेपाली अलपत्र

हुम्ला । चीनसँगको सीमावर्ती नाका हिल्सा लामो समयदेखि बन्द हुँदा त्यहाँ रहेका नेपाली नागरिक तथा सुरक्षाकर्मीले खाद्यान्न, खानेपानी र स्वास्थ्य उपचारको अभाव झेल्नुपरेको छ। चीनतर्फको नाका खुले पनि नेपालतर्फको सडकमा जमेको हिउँ नहटाइएकाले घर फर्किन चाहने नेपालीलाई थप समस्या भएको छ।

गत ९ गतेदेखि बन्द रहेको हिल्सा नाकामा दैनिक उपभोग्य वस्तुको अभाव बढ्दै गएको छ। लामो समयदेखि हरियो सागसब्जी खान नपाएको स्थानीय तथा सुरक्षाकर्मी बताउँछन्। माछामासु उपलब्ध हुन छाडेको छ भने मौज्दातमा रहेको दालको झोलसँग खाना खानुपर्ने अवस्था आएको हिल्सा सीमा सुरक्षा चौकी (बीओपी)का इन्स्पेक्टर केदार सापकोटाले बताउनुभयो।

सापकोटाका अनुसार खाद्यान्नसँगै स्वास्थ्य उपचारको समस्या पनि गम्भीर बनेको छ। हिल्सामा स्वास्थ्यचौकी वा मेडिकलसमेत नहुँदा बिरामी पर्दा उपचार पाउन कठिन भएको छ। सशस्त्र प्रहरी बलका एक जवानले सीएमए तालिम लिएको र उनीसँग उपलब्ध सामान्य औषधि, विशेषगरी सिटामोलकै भरमा बिरामीको उपचार गर्नुपर्ने अवस्था रहेको उहाँले बताउनुभयो।

चीनतर्फको नाका खुलेपछि बिहीबार १४४ जना नेपाली नागरिक नेपाल प्रवेश गरेका छन्। तीमध्ये केहीले हिउँ जमेको बाटो हुँदै यात्रा गर्नुपरेको छ। केही नागरिक पैदल मार्गबाट अघि बढिसकेका छन् भने चीनबाट ढिलो गरी नेपाल प्रवेश गरेकाहरू शुक्रबार बिहानै हिल्साबाट पैदल यात्रा सुरु गर्ने तयारीमा रहेको बताइएको छ।

नेपालतर्फको सडकमा जमेको हिउँ पन्छाउने काम भने बुधबारदेखि मात्रै सुरु भएको हो। नारा लेक क्षेत्रमा सडक सफा गर्न सानो स्काभेटर (भ्याकु) प्रयोग गरिएको छ। तर, मेसिन सानो भएकाले दैनिक बढीमा एकदेखि दुई किलोमिटर मात्रै सडक सफा गर्न सकिने अवस्था रहेको छ। हिउँ हटाउने काम सुस्त हुँदा हिल्सामा रोकिएका नागरिकको चिन्ता बढेको छ।

सडक सफा गर्ने काम यही गतिमा अघि बढे दसैँसम्म पनि घर पुग्न नसकिने चिन्ताका बीच बिहीबार एक सयभन्दा बढी नेपालीले हिल्साबाट पैदल यात्रा सुरु गरेका छन्।

लामो समयदेखि सीमा नाका बन्द हुनु, सडकमा बाक्लो हिउँ जम्नु, खाद्यान्न अभाव र स्वास्थ्य सेवाको पहुँच नहुनुले हिल्साको अवस्था थप कठिन बनेको छ। चीनतर्फको नाका खुले पनि नेपालतर्फको सडक सहज रूपमा सञ्चालनमा आउन नसक्दा घर फर्किन चाहने नागरिकले जोखिमपूर्ण यात्रा गर्नुपर्ने अवस्था छ।

स्थानीय तथा सुरक्षाकर्मीले तत्काल प्रभावकारी रूपमा हिउँ पन्छाएर सडक सञ्चालनमा ल्याउन नसके हिल्सामा खाद्यान्न तथा स्वास्थ्य सङ्कट थप गहिरिन सक्ने बताएका छन्।

हाल हिल्सामा सशस्त्र प्रहरीका ३५, नेपाल प्रहरीका २०, अध्यागमन कार्यालयका चार र भन्सारका चार गरी ६३ जना सरकारी कर्मचारी कार्यरत छन्। त्यहाँ केही स्थानीय नागरिकसमेत बस्दै आएका छन्।

शुक्रबार, असोज २३, २०८३ मा प्रकाशित