‘कन्सर्टमा कलाकारहरूको उपस्थिति हुने भएकाले दर्शकहरू बिहानै आउनुभएको रहेछ। पल र मलिका स्टेजमा जानेबित्तिकै दर्शकको हुटिङ असाध्यै आएको थियो। अभिनेत्री विपना थापालाई प्रत्यक्ष देख्दा दर्शकले ताली र हुटिङमार्फत माया व्यक्त गर्नुभयो। आकाश श्रेष्ठ र निकिता आचार्यको नृत्यमा वान्स मोरको आवाज आइरहेको थियो। गायक बाबुल र गंगा सोनामको गीतमा पनि दर्शकबाट उस्तै माया पाइयो,’ निर्देशक पन्तले भने।

कन्सर्टमा सहभागी हुनुअघि निर्देशक पन्तसहितको टोलीले पत्रकारहरूसँग भेटघाट तथा अन्तरक्रिया कार्यक्रमसमेत गरेको थियो। चलचित्र पत्रकार संघ रुपन्देहीका निवर्तमान अध्यक्ष मोहन न्यौपानेको संयोजनमा आयोजित कार्यक्रममा कलाकार तथा पत्रकारबीच चलचित्रका विभिन्न पक्षबारे छलफल गरिएको थियो।

चन्द्र पन्तको कथा तथा पटकथा रहेको चलचित्रमा पल शाह, मलिका महत, विपना थापा, रिस्ता गुरुङ, निकिता आचार्य, आकाश श्रेष्ठ, सबिन श्रेष्ठ, प्रदीप रावत, साइग्रेस पोखरेल, गजित विष्ट, नरेन खड्का र दिलिप अखेडालगायत कलाकारको मुख्य भूमिका रहेको छ।

चलचित्रको लेखनमा रोशन भट्ट र चन्द्र पन्तले सहकार्य गरेका छन् भने संवाद रोशन भट्टको रहेको छ। करण सिंह प्रोडक्सन एक्जिक्युटिभ रहेको चलचित्रमा नवराज उप्रेतीको छायांकन, बाबुल गिरीको संगीत, गम्भीर विष्टको नृत्य निर्देशन तथा साहिल खान र मिलन श्रेष्ठको सम्पादन रहेको छ।

चलचित्रको डिजिटल पार्टनर ओएसआर डिजिटल रहेको छ भने नेपालभर वितरणको जिम्मा आरआर फिल्म्सले लिएको छ।