अभिनेता कर्मा शाक्यले पनि चलचित्रको पटकथा नियमित रूपमा निर्माण भइरहेका नेपाली चलचित्रभन्दा फरक रहेको बताए। नयाँ निर्देशक र नवीन कथावस्तुमा काम गर्न आफू सधैँ उत्साहित हुने उल्लेख गर्दै उनले महिला पात्रलाई केन्द्रमा राखिएको कथामा विश्वास गरेकोमा निर्देशकलाई धन्यवाद दिए।

‘हिमालयन गोल्ड’ भारतभर एकसाथ प्रदर्शन हुने अवसर पाउने पहिलो नेपाली चलचित्र बनेको निर्माण पक्षको दाबी छ। चलचित्रको भारत वितरणका लागि मुम्बईमा एए फिल्म्सका संस्थापक तथा वितरक अनिल थडानीसँग औपचारिक सम्झौता भइसकेको छ। ‘दिलवाले दुल्हनिया ले जाएंगे’, ‘बाहुबली’, ‘आरआरआर’, ‘केजिएफ: च्याप्टर २’ र ‘पुष्पा’जस्ता चर्चित चलचित्र वितरण गरिसकेको एए फिल्म्सले नेपाली चलचित्रलाई भारतीय बजारमा पुर्‍याउने भएको हो।

एए फिल्म्सका संस्थापक थडानीले उत्कृष्ट कथावस्तु भएका चलचित्रलाई भारतीय दर्शकमाझ पुर्‍याउने आफ्नो उद्देश्य रहेको बताएका छन्।

चलचित्रका वितरक तथा निर्माता नकिम उद्दिनले पनि ‘हिमालयन गोल्ड’को अन्तर्राष्ट्रिय बजारमा राम्रो सम्भावना रहेको बताए। भारतमा प्रदर्शनका लागि सम्झौता भइसकेको र जापानलगायत अन्य देशमा पनि चलचित्रप्रति चासो देखिएको उनको भनाइ छ। नेपाली चलचित्रले अन्तर्राष्ट्रिय बजारमा पहुँच विस्तार गर्न सके समग्र उद्योगलाई फाइदा पुग्ने उनले बताए।

नेपालको मौलिकता, सर्भाइभल कथा र अन्तर्राष्ट्रिय प्रदर्शनको तयारीका कारण ‘हिमालयन गोल्ड’ नेपाली चलचित्र क्षेत्रका लागि चासोको विषय बनेको छ।