काठमाडौं। बडादशैँको अवसर पारेर शुक्रबार (असोज ३० गते) देखि देशव्यापी प्रदर्शनमा आउन लागेको बहुप्रतीक्षित पारिवारिक चलचित्र ‘आ बाट आमा २’ ले देशभरका मल्टिप्लेक्समा उत्साहजनक अग्रिम बुकिङ प्राप्त गरेको छ। प्रदर्शनको अघिल्लो दिन बिहीबारसम्म चलचित्रले देशभरका सिनेमाघरमा २०० भन्दा बढी शो पाएको छ।
विशेषगरी काठमाडौं उपत्यकाका प्रमुख मल्टिप्लेक्स बिग मुभिज, एफक्युब सिनेमाज, वान सिनेमाज, सिभिल मललगायतका हलले चलचित्रलाई उच्च शो संख्या दिएका छन्। दर्शकको बढी चाप हुने दिउँसो तथा साँझका प्राइम टाइम शोसमेत उपलब्ध गराइएको छ। अनलाइन टिकट बुकिङ खुल्नासाथ विभिन्न शोमा दर्शकको आकर्षण बढेको देखिएको छ।
उपत्यकाबाहिर पोखरा, बुटवल, नारायणगढ, नेपालगन्ज र धरानलगायतका प्रमुख सहरमा पनि चलचित्रको अग्रिम टिकट बुकिङ उत्साहजनक रहेको जनाइएको छ। सडक कन्सर्ट तथा प्रचारप्रसारका क्रममा मोफसलमा देखिएको दर्शकको उत्साह टिकट बुकिङमा समेत प्रतिबिम्बित भएको हल सञ्चालकहरूको भनाइ छ।
चलचित्रको पहिलो भागले हासिल गरेको व्यावसायिक सफलता, हालै सार्वजनिक पाँच मिनेट लामो भावनात्मक ट्रेलर तथा युट्युबमा करोडौँ भ्युज बटुलेका दशैँ गीतले दर्शकमाझ यसको प्रतीक्षा बढाएको देखिन्छ। भावनात्मक कथावस्तुका कारण चलचित्रले सेन्सर बोर्डबाट ‘पीजी’ प्रमाणपत्रसमेत प्राप्त गरेको छ। दशैँको बिदामा परिवारसहित चलचित्र हेर्न चाहने दर्शकका लागि ‘आ बाट आमा २’ प्रमुख आकर्षण बन्ने अपेक्षा गरिएको छ।
चन्द्र पन्तको निर्देशनमा बनेको चलचित्रमा विपना थापा, पल शाह, मलिका महत, स्वर्गीय प्रदीप रावत, साइग्रेस पोखरेल र नरेन खड्कालगायतका कलाकारको अभिनय रहेको छ।
अग्रिम बुकिङमा देखिएको उत्साह र देशभर प्राप्त शो संख्याका आधारमा चलचित्रले प्रदर्शनको पहिलो दिन राम्रो अकुपेन्सी हासिल गर्ने अपेक्षा गरिएको छ। अब चलचित्रको वास्तविक व्यावसायिक प्रदर्शनले दर्शकको यो उत्साहलाई बक्स अफिसको कमाइमा कत्तिको रूपान्तरण गर्छ भन्ने चासो बढेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.