चुनावी प्रचारप्रसार लागि शीर्ष नेताहरु देश दौडाहामा

कात्तिक २१ , काठमाडौं । आगामी मंसिर ४ गते हुने प्रतिनिधिसभा र प्रदेशसभा चुनावको मिति नजिकिंदै गर्दा राजनीतिक दल र उम्मेदवारहरुले चुनावी प्रचार प्रसारलाई तीव्र बनाएका छन् ।

गत बिहिबारदेखि निर्वाचन प्रचारप्रसार खुल्ला भएपनि राजनीतिक दलका शीर्ष नेताहरु चुनावी देश दौडाहामा निस्किएका हुन् प्रधानमन्त्री तथा नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली, माओवादी केन्द्रका अध्यक्ष पुष्पकमल दाहाल र राष्ट्रिय प्रजातन्त्र पार्टीका अध्यक्ष राजेन्द्र लिङ्देन चुनावी देश दौडाहामा अग्रस्थानमा देखिएका छन् ।

गत बिहिबार गृहजिल्ला समेत रहेको चुनावी क्षेत्रबाट चुनावी अभियानको सुरुवात गरेका प्रधानमन्त्री एवं नेपाली कांग्रेसका सभापति शेरवहादुर देउवा लगातार ४ दिन आफ्नै चुनावी क्षेत्रमा व्यस्त रहे । गृहजिल्ला बसाईको अन्तिम दिन आइतबार प्रधानमन्त्री देउवाले दुई वटा चुनावी सभालाई सम्बोधन गरे । बिहान ११ बजे डडेल्धुराको आलिताल गाउँपालिका गोदाममा आयोजित चुनावी सभालाई सम्बोधन गरेका देउवाले दिउँसो २ बजे परशुराम नगरपालिकाको जोगबुढामा आयोजना गरिएको आमसभालाई सम्बोधन गरे । बुधबार काठमाडौंबाट कैलालीको धनगढी हुँदै बिहिबार डडेल्धुरा पुगेका प्रधानमन्त्री देउवाले अन्य जिल्लाका चुनावी क्षेत्रमा आयोजना हुने चुनावी सभालाई सम्बोधन गर्ने कार्यतालिका छ ।

दार्चुलाको खलंगाबाट शुक्रबार आसन्न निर्वाचन केन्द्रित चुनावी अभियानको सुरुवात गरेका नेकपा एमालेका अध्यक्ष केपी शर्मा ओलीले सोही दिन बैतडी र कञ्चनपुरको चुनावी सभालाई सम्बोधन गरे। शनिबार काठमाडौंमा आयोजित प्रवासी नेपाली मञ्चको प्रथम अन्तर्राष्ट्रिय अधिवेशनको उद्घाटन गरेका ओली आइतबार चुनावी प्रचारकै क्रममा बाग्लुङ, स्याङ्जा र पोखरामा आयोजना गरिएका पार्टीका चुनावी सभालाई सम्बोधन गरे । आसन्न निर्वाचन केन्द्रित ४० स्थानका चुनावी सभालाई सम्बोधन गर्ने कार्यतालिका रहेको ओलीले आवश्यकता अनुसार अन्य चुनावी सभालाई पनि सम्बोधन गर्ने सचिवालयले जनाएको छ ।

नेकपा माओवादी केन्द्रका अध्यक्ष पुष्पकमल दाहाल पनि चुनावी प्रचारप्रसारमा उत्तिकै व्यस्त देखिएका छन । गत बिहिबार आफ्नै निर्वाचन क्षेत्र गोरखाका सत्तागठबन्धनका उम्मेदवारहरुसँग काठमाडौंमै अन्तरक्रिया गरेका दाहाल शनिबारदेखि चुनावी क्षेत्रमै केन्द्रित भएका छन । चुनावी सभालाई सम्बोधन गर्न अध्यक्ष दाहाल मंगलबार जुम्ला जाने कार्यक्रम तय गरिएको छ ।

चुनाव प्रचारप्रसार खुल्ला भएकै दिन काठमाडौंको चुनावी सभालाई सम्बोधन गरेका राप्रपाका अध्यक्ष राजेन्द्र लिङ्देनले शनिबार गोरखा र नवलपरासीमा आयोजना गरिएको पार्टीको चुनावीसभालाई सम्बोधन गरे। आइतबार पनि अध्यक्ष लिङ्देन चुनावी प्रचारमै व्यस्त रहनुभयो । राजनीतिक दलका अन्य शीर्षस्थ नेताहरु माधवकमुार नेपाल, रामचन्द्र पौडेल, उपेन्द्र यादव, महन्थ ठाकुर लगायतका नेताहरु भने आफ्नै निर्वाचन क्षेत्रमा केन्द्रित रहेका छन् ।

विभिन्न निर्वाचन क्षेत्रमा आयोजना हुने आमसभालाई आवश्यकता अनुसार सम्बोधन गर्ने नेताहरुको तयारी रहेकाे छ ।

सोमबार, कार्तिक २१, २०७९ मा प्रकाशित