भ्रमणमा जाने टोलीको संख्या सानो बनाउन प्रधानमन्त्रीको निर्देशन

नमस्ते चितवन

सोमबार, भदौ २५, २०८० मा प्रकाशित

काठमाडौँ, २५ भदौ ।
प्रधानमन्त्री पुष्पकमल दाहाल प्रचण्डसँग यही भदौ २९ गते अमेरिका भ्रमणमा जाने टोलीको संख्या घट्ने भएको छ ।
यसअघि प्रधानमन्त्रीसँग परराष्ट्रमन्त्री एनपी साउदसहित २४ जनाको टोली अमेरिका जाने मन्त्रिपरिषद्ले निर्णय गरेको थियो । तर प्रधानमन्त्री प्रचण्डले संख्या घटाएर पाँच जना पुर्याउन निर्देशन दिएको स्रोतले जनाएको छ ।

सोमबार बिहान प्रधानमन्त्रीले मुख्यसचिव बैकुण्ठ अर्याललाई बोलाएर पाँच सदस्यीय टोली बनाउन निर्देशन दिएका हुन् । तर प्रधानमन्त्रीका प्रेस सल्लाहकार गोविन्द आचार्यले मंगलबार बस्ने मन्त्रिपरिषद् बैठकले प्रधानमन्त्रीसँग कति जनाको टोली जाने भन्ने निर्णय गर्ने बताए ।

भ्रमणको एजेन्डाबारे परामर्श लिन आइताबार बोलाइएको बैठकमा भ्रमण टोलीको आकार ठूलो भएको भन्दै प्रश्न उठेको थियो । प्रधानमन्त्री प्रचण्ड संयुक्त राष्ट्रसंघको ७८औं महासभामा भाग लिन भदौ ३० गते नेपाली प्रतिनिधिमण्डलको नेतृत्व गर्दै न्युर्योक जान लागेका हुन् । त्यसपछि प्रचण्ड असोज ५ गते न्युयोर्कबाट चीन प्रस्थान गर्नेछन् ।