माओवादीको निष्कर्ष : पार्टी विघटनको यात्रा रोकियो

सत्तारुढ माओवादी केन्द्रले तीन महिने अभियानले विघटनको यात्रालाई रोकेर पार्टी बनाउने आधार दिएको निष्कर्ष निकालेको छ ।

माओवादी केन्द्रले भदौ १६ देखि मंसिर १६ सम्म तीन महिना जनतासँग माओवादी विशेष रुपान्तरण अभियान चलाएको थियो । शनिबार बसेको स्थायी कमिटी बैठकमा प्रदेश इन्चार्जहरुले रिपोर्टिङ गरेका थिए । अभियानका क्रममा वडा तथा टोलसम्म समिति बनेको र पार्टी गतिशील भएको ब्रिफिङ गरेका छन् ।

नेताहरुका अनुसार पछिल्लो समय माओवादीमा संगठित भन्दा पनि समर्थक र शुभेच्छुकलाई पनि सदस्य बनाउने, कतिपयको हकमा त अरुले नै शुल्क तिरेर सदस्य बनाइदिने प्रवृत्ति देखिएको थियो । तर यो पटक अभियानका क्रममा संगठित र साधारण सदस्य अलग गरिएको भन्दै एक नेताले भने, ‘लेबी तिरेर कमिटीमा बस्ने संगठित सदस्यहरु ५०, ६० प्रतिशत नवीकरण भएको छ ।’

माओवादी अध्यक्ष पुष्पकमल दाहाल प्रचण्डले अभियानले पार्टी विघटनतर्फको यात्रा रोकिएको विश्लेषण गर्नु भउको छ । ‘यो अभियानले विघटनको यात्रालाई रोकेर पार्टी बनाउने आधार दिएको छ’, प्रचण्डले बैठकमा भन्नुभयो, ‘कार्यकर्ता पंक्तिमा रहेको निराशा थोरै भए पनि कम भएको छ । पार्टी जीवित छ भन्ने आएको छ ।’

बैठकपछि उपाध्यक्ष एवं पार्टी प्रवक्ता अग्नि सापकोटाले पनि अभियान विगतको भन्दा प्रभावकारी भएको र यसले पार्टीमा गतिशीलता ल्याएको निष्कर्षमा पुगेको बताउनु भयो । अभियानले पार्टी निर्माणका लागि विश्वासको वातावरण बनाउने आधार दिएको भन्दै उहाँले, ‘यो पार्टी संरक्षणका लागि कोशेढुंगा बन्छ भन्ने हाम्रो निष्कर्ष छ ।’

विधान सम्मेलन गरेर पार्टी कमिटीहरुलाई छरितो बनाउने र नेतृत्व छनोट विधिलाई लोकतान्त्रिक बनाउने हो भने पार्टी बनाउन सकिने नेताहरुको निष्कर्ष छ । माओवादी बैठकले आगामी फागुन १–३ सम्म विधान अधिवेशन गर्ने निर्णय समेत गरेको छ ।

उपाध्यक्ष पम्फा भुसालको नेतृत्वमा रहेको पदाधिकारीहरु सम्मिलित मस्यौदा समितिले बनाएको विधानको मस्यौदा सुझावका लागि तल्लो कमिटीमा पठाइनेछ ।

मस्यौदा समितिका एक सदस्यका अनुसार कमिटीहरुको आकार सानो बनाउनुका साथै प्रदेश, जिल्ला, पालिका र वडाका कमिटीलाई अधिकार सम्पन्न बनाइएको छ । विभागहरुको संख्या घटाइएको छ । तल्लो कमिटीहरुबाट आएको सुझावका आधारमा २६ माघमा बस्ने स्थायी कमिटी बैठकमा विधानमाथि थप छलफल हुनेछ र, विधान अधिवेशनमा पेश हुनेछ । फागुनको विधान अधिवेशनमा १३०० भन्दा बढी प्रतिनिधि सहभागी हुनेछन् । शनिबारकै बैठकले विधान अधिवेशनमा सहभागी हुने प्रतिनिधि छनोटको मापदण्ड बनाएको छ ।

शनिबार, पुष २८, २०८० मा प्रकाशित