एमसिसीले ६ अर्ब ८० करोड अनुदान थप गर्ने

नमस्ते चितवन

आइतबार, पुष २१, २०८१ मा प्रकाशित

अमेरिकी अनुदान सहायता परियोजना मिलेनियम च्यालेन्ज कर्पोरेसन (एमसिसी) ले नेपाललाई छ अर्ब ८० करोड रुपियाँ अनुदान सहायता रकम थप गर्ने भएको छ । एमसिसीको सञ्चालक समितिले एमसिसी नेपाल कम्प्याक्टका लागि सो बराबरको अनुदान सहायता थप गर्ने निर्णय गरेको हो ।

सञ्चालक समितिले निर्णय सार्वजनिक गर्दै नेपाल सरकार र अमेरिकी सहायता एमसिसीबिचको साझा प्रतिबद्धतालाई जोड दिँदै नेपालको विकासमा रूपान्तरणकारी र उच्च गुणस्तरीय पूर्वाधार निर्माण परियोजनामार्फत सरकारको विकास प्राथमिकतालाई सघाउने विश्वास व्यक्त गरेको छ ।

एमसिसी सम्झौता कार्यान्वयन निकायका उपाध्यक्ष क्यामरन अल्फोर्डले थपिएको अतिरिक्त सहायता रकमले नेपालको विद्युतीय प्रसारण ग्रिडको सुदृढीकरणसँगै दीर्घकालीन आर्थिक वृद्धिलाई सुनिश्चित गर्न सघाउ पुग्ने उल्लेख गर्नुुभएको छ ।

साथै नेपालको विकासमा दुई देशबिचको सहकार्य र समर्पणलाई थप पुष्टि गर्ने पनि उहाँले प्रस्ट पार्नुभएको छ ।

अमेरिकी सहायता अनुदान र नेपाल सरकारको लागत साझेदारीमा एमसिसी कम्प्याक्ट संसद्बाट अनुमोदन हुँदै गत २०८० साल भदौ १३ गतेदेखि कार्यान्वयनमा गएको हो । कुल ९२ अर्ब बराबरको एमसिसी अन्तर्गतका आयोजनालाई सबल बनाउने उद्देश्यसहित रकम थप गरिएको समितिले प्रस्ट पारेको छ ।

यस परियोजना अन्तर्गत चार सय केभी डबलसर्किटको ३१५ किलोमिटर लामो प्रसारण लाइन बन्ने व्रmममा रहेको छ । जस अनुसार काठमाडौँको लप्सीफेदी, नुवाकोटको रातमाटेमा सबस्टेसनसहित मकवानपुर, धादिङ, तनहुँ, चितवन, नवलपरसी हुँदै भारतको महेसपुरसम्मको प्रसारण लाइन बन्ने तय भएको छ । जसबाट नेपाल, भारत तथा बङ्गलादेशबिच त्रिदेशीय विद्युत् आयात निर्यातको बाटो सहज हुने जनाइएको छ ।

एमसिसी अमेरिकी सरकारको सन् २००४ मा स्थापित विकास एजेन्सी हो । जसले आर्थिक वृद्धिमा विश्वका विभिन्न मुलुकलाई सघाउँदै गरिबी न्यूनीकरण गर्न मद्दत गर्ने उद्देश्य राखेको छ ।

आइतबार, पुष २१, २०८१ मा प्रकाशित