काठमाडौं- भारत र पाकिस्तानले एक अर्कामाथि युद्धविराम ‘उल्लंघन’ को आरोप लगाएका छन् । शनिवार दुवै देशले सैन्य आक्रमणको केही दिनपछि युद्धविराममा सहमति भएको घोषणा गरेका थिए ।
भारत-प्रशासित कश्मीरमा विस्फोटको आवाज सुनेपछि भारतका परराष्ट्र सचिव विक्रम मिस्रीले भने, ‘हामीले प्राप्त गरेको समझदारीको बारम्बार उल्लंघन भएको छ ।’
त्यसको केही समयपछि प्रतिकृया दिंदै भारतले केही क्षेत्रमा उल्लंघन गरिरहे पनि युद्धविरामको निष्ठापूर्वक कार्यान्वयनमा प्रतिबद्ध रहेको पाकिस्तानी विदेश मन्त्रालयले जनाएको छ ।
गत चार दिनदेखि भारत र पाकिस्तानबीच भएको भिडन्त दशकौँकै सबैभन्दा गम्भीर सैन्य संघर्ष भएको बताइएको छ । ड्रोन, क्षेप्यास्त्र र तोपहरूको प्रयोग भारतले पाकिस्तान र पाकिस्तान-प्रशासित कश्मीरमा आक्रमण गरेपछि सुरु भएको थियो ।
भारतको यो कारबाही गत महिनाको पहलगाममा भएको एक घातक उग्रवादी आक्रमणको प्रतिक्रिया स्वरूप भएको थियो । पाकिस्तानले भने उक्त घटनामा आफ्नो संलग्नता अस्वीकार गर्दै आएको छ ।
अमेरिकी राष्ट्रपति डोनाल्ड ट्रम्पले सोशल प्लेटफर्ममार्फत भारत र पाकिस्तानबीचको सम्झौता अमेरिकाको मध्यस्थतामा सम्भव भएको बताउनुभएको थियो ।
पछि पाकिस्तानका विदेश मन्त्रीले पनि दुई देशबीच समझदारीमा सहमति भएको पुष्टि गर्दै भारत र पाकिस्तान र भारतबीच युद्धविराम सम्झौता भएको बताउनु भयो ।
तर यो घोषणा केही घण्टापछि नै भारत-प्रशासित कश्मीरको श्रीनगर र जम्मु सहरमा बसोबास गर्ने स्थानीय र बीबीसीका पत्रकारहरूले विस्फोटको आवाज र आकासमा चमक देखिएको बताएका छन् ।
शनिवार साँझ भएको सहमतिको पछिल्ला केही घण्टामै बारम्बार उल्लंघन भएको भारतीय परराष्ट्र सचिव विक्रम मिस्रीले बताउनुभएको छ ।
सचिव मिस्रीले एक पत्रकार सम्मेलनमा भारतीय सशस्त्र बलले सम्झौता उल्लंघनको ‘उपयुक्त जवाफ दिइरहेको’ बताउँदै पाकिस्तानलाई यी उल्लंघनको समाधान गर्न आह्वान गर्नुभएको छ ।
त्यसको जवाफमा पाकिस्तानको विदेश मन्त्रालयका प्रवक्ताले पाकिस्तान र भारतबीच घोषणा गरिएको युद्धविरामको निष्ठापूर्वक कार्यान्वयनमा पाकिस्तान प्रतिबद्ध रहेको बताउनुभयो ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.