अख्तियारद्वारा एक वर्षमा २९ हजारभन्दा बढी उजुरी फर्स्यौट

नमस्ते चितवन

शनिबार, साउन १०, २०८२ मा प्रकाशित

अख्तियार दुरुपयोग अनुसन्धान आयोगले आर्थिक वर्ष २०८१/८२ मा छानबिन तथा अनुसन्धानबाट २९ हजार ७०३ उजुरी फर्स्यौट गरेको छ । यस्तै सो अवधिमा अख्तियारले विशेष अदालतमा १३७ वटा मुद्दा दायर गरेको छ ।

आयोगले शुक्रबार जारी गरेको विज्ञप्तिअनुसार आर्थिक वर्ष २०८१/८२ मा आयोगमा विभिन्न माध्यमबाट २८,५९७ उजुरी प्राप्त भएका थिए । यसैगरी अघिल्लो वर्षबाट जिम्मेवारी सरेर आएका ८,४२९ उजुरी समेत गरेर कुल ३७,०२६ उजुरीहरूमध्ये ८०.२२ प्रतिशत उजुरी फर्स्यौट भएको आयोगले जनाएको छ । उजुरी प्राप्त हुने माध्यमहरूमध्ये वेबसाइटबाट १०,२४५, लिखित निवेदनबाट १०,१८०, इमेलमार्फत ८,४८८ र हुलाक सेवाबाट ५,५५५ उजुरीहरू प्राप्त भएका थिए। अन्य माध्यमबाट २,५५८ उजुरीहरू आएको आयोगले जानकारी दिएको छ ।

प्राप्त उजुरीमध्ये सङ्घीय सरकारसँग सम्बन्धित ३३.६९ प्रतिशत, प्रदेश सरकारसँग सम्बन्धित १२.४७ प्रतिशत र स्थानीय तहसँग सम्बन्धित ५३.८४ प्रतिशत रहेका छन् । आयोगका अनुसार ६,७१५ उजुरीहरू सम्बन्धित निकायमा कारबाहीका लागि पठाइएको र ५८६ उजुरी सुझावसहित कार्यान्वयनका लागि सिफारिस गरिएको छ। समीक्षा अवधिमा आयोगले ८१ वटा बैठक गरी १,४११ वटा निर्णयहरू गरेको छ ।

विशेष अदालतमा दायर १३७ मुद्दाहरूमा ७५३ जना प्रतिवादीविरुद्ध करिब ५ अर्ब ९७ करोड रुपैयाँ बिगो माग गरिएको छ। तीमध्ये ३७ वटा घुस/रिसवत, ३६ वटा गैरकानुनी लाभ, २७ वटा नक्कली शैक्षिक प्रमाणपत्र, २३ वटा सार्वजनिक सम्पत्तिको क्षति, ८ वटा गैरकानुनी सम्पत्ति आर्जन र २ वटा सम्पत्ति शुद्धीकरणसम्बन्धी रहेका छन् ।

आर्थिक वर्ष २०८१/८२ मा विशेष अदालतबाट ३९५ वटा मुद्दा फैसला भएका छन्, जसमध्ये ११९ वटा सोही वर्षका हुन्। तीमध्ये ६७.२३ प्रतिशतमा कसुर प्रमाणित भएको छ। सो अवधिमा सर्वोच्च अदालतमा २५१ पुनरावेदन र ५ पुनरावलोकन गरिएको प्रवक्ता राजेन्द्र कुमार पौडेलले जानकारी दिए ।