काठमाडौँ, मङ्सिर २७ गते । नेपाल प्रिमियर लिग (एनपिएल) दोस्रो सिजनको उपाधि लुम्बिनी लायन्सले जितेको छ । त्रिवि क्रिकेट मैदानमा सम्पन्न फाइनल खेलमा सुदूरपश्चिम रोयल्सलाई ६ विकेटले पराजित गर्दै लुम्बिनीले उपाधि उचालेको हो ।
टस जितेर ब्याटिङ गरेको सुदूरपश्चिम रोयल्स लुम्बिनीको कसिलो बलिङ सामु १९ ओभर १ बलमै अलआउट हुँदै ८५ रनमा सीमित भयो । सुदूरपश्चिमका लागि ओपनर इशान पाण्डेले सर्वाधिक ३३ रन बनाए । कप्तान दीपेन्द्रसिंह ऐरीले १३ रन जोड्दा हर्षित सिंह र स्कट कुग्लेजिनले समान १०–१० रन बनाए । अन्य ब्याट्सम्यानले दोहोरो अंकमा रन जोड्न सकेनन् ।
सुदूरपश्चिमलाई कम स्कोरमा रोक्न लुम्बिनीका कप्तान रोहितकुमार पौडेलले ह्याट्रिक पूरा गरे । उनले ११ औँ ओभरको चौथो, पाँचौँ र छैटौँ बलमा क्रमशः दीपेन्द्रसिंह ऐरी, दीपक बोहरा र पुनित मेहराको विकेट लिँदै ह्याट्रिक हासिल गरे । यस्तै शेर मल्ल र रुबेन ट्रुम्पलम्यानले तीन–तीन तथा तिलक भण्डारीले एक विकेट लिए ।
८६ रनको लक्ष्य पछ्याएको लुम्बिनी लायन्सले ९ ओभरमै लक्ष्य पूरा गर्दै उपाधि आफ्नो नाममा लेखायो । लुम्बिनीका लागि दिनेश अधिकारीले सर्वाधिक ४२ रन बनाए । कप्तान रोहित पौडेलले १६ रन जोड्दा डार्सी सर्टले १४ र निरोशन डिकवेलाले १० रनको योगदान दिए ।
सुदूरपश्चिमका लागि हेमन्त थामीले दुई विकेट लिए भने कप्तान दीपेन्द्रसिंह ऐरी र अविनास बोहोराले एक–एक विकेट हात पारे ।
सुदूरपश्चिम रोयल्स पहिलो क्वालिफायरमा विराटनगरलाई ७७ रनले हराउँदै फाइनलमा पुगेको थियो । लुम्बिनी लायन्सले दोस्रो क्वालिफायरमा विराटनगरलाई ४० रनले पराजित गर्दै फाइनल यात्रा तय गरेको थियो ।
अघिल्लो सिजनको पनि उपविजेता रहेको सुदूरपश्चिम रोयल्सले यसपटक समेत फाइनलमा पराजय व्यहोर्दै लगातार दोस्रो पटक उपाधि नजिक पुगेर चुक्न पुगेको छ ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.