माओत्से गुरुङको निर्देशनमा ‘पेन्सन पट्टा’को छायांकन सुरु

नमस्ते चितवन

बिहिबार, पुष ०३, २०८२ मा प्रकाशित

काठमाडौं , पौष ०३ । कलाकार माओत्से गुरुङको निर्देशनमा निर्माण हुने नेपाली चलचित्र **‘पेन्सन पट्टा’**को शुभमुहूर्तसँगै छायांकन सुरु गरिएको छ। चलचित्रको छायांकन कास्की जिल्लाको ताङतिङ गाउँबाट सुरु गरिएको हो। निर्माण टिमका अनुसार करिब ३५ दिनसम्म ताङतिङ आसपासका सुन्दर लोकेसनमा छायांकन गरिनेछ।

गुरुङ सिनेमाका ‘गडफादर’का रूपमा परिचित माओत्से गुरुङको समेत लगानी रहने चलचित्रमा दयाहाङ राई, सुनिल थापा, पशुपति राई, गौमाया गुरुङ, बुद्धि तामाङ, विल्सन विक्रम राई, राज थापा काउछा, लुनिभा तुलाधर, विश्वास गुरुङ, माया गुरुङ, यासिली राई लगायतका कलाकारहरूको अभिनय रहनेछ।

चलचित्रको शीर्षकले भूतपूर्व लाहुरेको कथाजस्तो आभास दिलाए पनि, निर्देशक तथा निर्माता माओत्से गुरुङका अनुसार ‘पेन्सन पट्टा’ लोभी स्वभावको एक युवक कसरी दानी र जिम्मेवार व्यक्ति बन्छ भन्ने कथामा आधारित छ।

माओत्से गुरुङ फिल्म्सको ब्यानरमा निर्माण हुने चलचित्रको कथा स्वयं निर्देशक गुरुङले लेखेका हुन्। चलचित्रमा मीन कोन्मे गुरुङ (सिकलेस), भोजबहादुर गुरुङ (युके) र सपना गुरुङको लगानी रहेको छ। प्रोडक्सन म्यानेजरको जिम्मेवारी डिबी गुरुङले सम्हालेका छन् भने सिनेमाटोग्राफी सुशन प्रजापतिले गर्नेछन्। कास्टिङ डिरेक्टर सुरज तमु हुन्।चलचित्रको संगीत झुमा लिम्बु, मनोज थापा मगर र शिव बराइलीले तयार पार्नेछन्।

उल्लेखनीय छ, निर्देशक माओत्से गुरुङको डेब्यु निर्देशनमा बनेको चलचित्र ‘दयारानी’ बक्सअफिसमा सफल भएको थियो। चरित्र अभिनेताका रूपमा स्थापित गुरुङ पछिल्लो समय लेखन, निर्देशन र निर्माणमा समेत सक्रिय हुँदै आएका छन्। उनले यसअघि गुरुङ भाषाका चलचित्रहरू निर्देशन गरिसकेका छन्।