काठमाडौं । चलचित्र वितरक रोहित कट्टेल पहिलोपटक चलचित्र निर्माणमा प्रवेश गरेका छन् । चलचित्र वितरण कम्पनी आरआर फिल्म्सका सञ्चालक कट्टेल चलचित्र ‘मिरमिरे’ मार्फत कार्यकारी निर्माता बनेका हुन् ।
लामो समयदेखि चलचित्र वितरण गर्दै आएका कट्टेल किन निर्माता बने ? चलचित्रको कथा मन परेपछि आफू निर्माणमा अग्रसर भएको उनको भनाइ छ । निर्देशक यम शेर्पाले सुनाएको कथाले आफूलाई प्रभावित गरेपछि लगानी गर्ने निर्णय लिएको कट्टेलले बताए ।
“निर्माणका हिसाबले ‘मिरमिरे’ मेरो तेस्रो चलचित्र हो । जब निर्देशक यम शेर्पाले कथा सुनाउनुभयो, त्यो मलाई निकै मन प¥यो,” कट्टेल भन्छन्, “राम्रो कथामा चलचित्र निर्माणको प्रस्ताव आएपछि सहकार्य नगर्नुपर्ने कुनै कारण देखिनँ, त्यसैले लगानी गरेको हुँ ।”
बाबु र छोरीबीचको सम्बन्धमा आधारित कथाले आफूलाई गहिरो रूपमा छोएको उनले बताए । “यो हामी सबै नेपालीको कथा हो, घर–घरको कथा हो,” उनी भन्छन्, “धेरै नेपालीले भोगेको र देखेको यथार्थ भएकाले सुन्नासाथ कथा मन परेको हो ।”
राम्रो कथामा आधारित चलचित्र निर्माण गर्न आफू सधैँ तयार रहेको बताउँदै कट्टेलले कहिले वितरण त कहिले निर्माणमार्फत गुणस्तरीय चलचित्र दर्शकमाझ पुर्याउनु आफ्नो दायित्वसमेत भएको उल्लेख गरे ।
यम शेर्पाको लेखन तथा निर्देशनमा बनेको चलचित्र ‘मिरमिरे’ माघ १ गतेदेखि देशभर प्रदर्शनमा आउँदै छ । यार्सा फिल्म्सको प्रस्तुतिमा बनेको यस चलचित्रमा दयाहाङ राई, प्रकाश सपूत, सिर्जना निङलेखु, माओत्से गुरुङ, छुल्ठिम गुरुङ, भोलाराज सापकोटा, विमल यादव, शाइसा गौचन, दिविशा पन्त, चिराग श्रेष्ठ र नमनराज गजुरेलको अभिनय रहेको छ ।
चलचित्रका निर्माता निमु शेर्पा, छोङ्बा लामा शेर्पा र आङछिरिङ शेर्पा हुन् भने गोविन्द बोहरा र सुदीप कुँवर सह–निर्माताको भूमिकामा छन् । चलचित्रका कार्यकारी निर्माता आरआर फिल्म्सका सञ्चालक रोहित कट्टेल हुन् ।
यस चलचित्रका लाइन प्रोड्युसरमा वीरेन्द्र शाही, मुख्य सहायक निर्देशकमा सुदीप कुँवर, मेकअपमा सञ्जु थलाङ लिम्बू तथा निर्माण नियन्त्रकमा दिलीप पन्त रहेका छन् ।चलचित्र ‘मिरमिरे’को देशभरको वितरण जिम्मेवारी रोहित कट्टेल र रत्न श्रेष्ठको आरआर फिल्म्सले लिएको छ ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.