काठमाडौं – प्रेमकथामा आधारित नयाँ नेपाली चलचित्र ‘प्रेम गीता’ को औपचारिक पोस्टर सार्वजनिक गरिएको छ। निर्माण टिमले बिहीबार कथावस्तु झल्किने पोस्टर रिलिज गर्दै प्रचार अभियान सुरु गरेको हो।

सार्वजनिक पोस्टरमा मुख्य जोडी जाहान्वी बस्नेत र साजिद खान हरियाली पहाडी परिवेशमा रोमान्टिक मुद्रामा प्रस्तुत छन्। पोस्टरले चलचित्रको प्रेमप्रधान तथा संगीतमय धार स्पष्ट संकेत गर्छ।

यस चलचित्रमार्फत साजिद खानलाई नयाँ अनुहारका रूपमा प्रस्तुत गरिएको छ। अर्थात् यो उनको डेब्यु फिल्म हो। फिल्ममा जाहान्वी बस्नेत, सुशील पोखरेल, अर्जुन गुरुङ, मनिल तामाङ, आइशा पौडेल, दिप्सन लिम्बू, मन्शी शर्मा, मौसम खड्का, रियाशा सापकोटा र श्याम मगरलगायत कलाकारहरूको अभिनय रहेको जनाइएको छ।

अर्नव बस्नेतको प्रस्तुति रहेको यस फिल्मको कथा सिताराम ढुङ्गेलको हो भने पटकथा तथा संवाद मौनता श्रेष्ठले तयार पारेका हुन्। गीतमा संगीत दिप्सन लिम्बूले गरेका छन्।

प्राविधिक पक्षमा डिओपी रामेश्वर हुमागाईँ, नृत्य निर्देशन सुरेश पाण्डे, द्वन्द्व निर्देशन किरण दाहाल, सम्पादन बन्दे प्रसाद, रङ संयोजन प्रबिन ढकाल तथा मिक्सिङ मुकेश शाहको रहेको छ। सहायक निर्देशक सागर बोहोरा र चिफ एडीका रूपमा बिनयराज पौडेल रहेका छन्।

निर्देशक बस्नेतका अनुसार चलचित्रले युवापुस्ताको प्रेम, भावना र संघर्षलाई केन्द्रमा राखेको छ। प्रदर्शन मिति भने छिट्टै सार्वजनिक गरिने निर्माण पक्षले जनाएको छ।