काठमाडौं – सुशील पोखरेलको प्रस्तुतिमा निर्माण भएको फिल्म ‘परालको आगो’ अमेरिका र क्यानडामा सोल्ड आउट भएको छ। निर्माण पक्षका अनुसार फस्ट लुक्स सार्वजनिक गरेको दुई दिनमै ती देशका लागि प्रदर्शन अधिकार बिक्री भएको हो।
अमेरिका र क्यानडाका लागि चलचित्र इएनटीले प्रदर्शन अधिकार किनेको निर्माता पोखरेलले जानकारी दिएका छन्।“हाम्रो फिल्मलाई अमेरिका र क्यानडामा प्रदर्शन अधिकार बिक्री गरिसकेका छौँ। अन्य देशमा पनि कुराकानी भइरहेको छ,” उनले भने।
लक्ष्मण सुनारको निर्देशनमा बनेको यो फिल्म छायांकनअघि नै चर्चामा थियो। पोस्टर सार्वजनिक भएपछि दर्शकमाझ थप कौतुहलता देखिएको निर्माण टिमको दाबी छ। विदेशमा रहेका नेपाली दर्शकले पनि फिल्मप्रति विशेष चासो देखाएका छन्।
फिल्ममा सुहाना थापा, सौगात मल्ल र प्रकाश सपुत मुख्य भूमिकामा छन्। पोस्टर रिलिजपछिको प्रतिक्रियाले यी तीन कलाकारलाई एउटै पर्दामा हेर्न दर्शक उत्साहित रहेको संकेत दिएको छ।
ग्रामीण परिवेश, पारिवारिक सम्बन्ध तथा समाजभित्र लुकेका मनोवैज्ञानिक र भावनात्मक संघर्षलाई कथाको केन्द्रमा राखिएको फिल्ममा सिर्जना अधिकारी, किशोर भण्डारी, ज्याक श्रेष्ठ, सरिता भण्डारी, रेणु न्यौपाने र बाल कलाकार मन्जिला बाँनियालगायतको अभिनय छ।
हरि ॐ सिने मेकर्स प्रा.लि.को निर्माणमा बनेको फिल्मका निर्माता सुशील पोखरेल हुन्। लेखन सुशील देवकोटाले गरेका छन् भने छायांकन संकल्प भुजेलले गरेका छन्।
नृत्य निर्देशन रामजी लामिछाने, सम्पादन मिलन श्रेष्ठ, रंग संयोजन कनाल कँवरको छ। भिएफएक्स समिर मिया र सत्यम रानाले गरेका छन् भने टिजर–ट्रेलर साहिल खानले तयार पारेका छन्। ५.१ मिक्सिङ मुकेश शाहले गरेका छन्। पाश्र्व संगीत किरण तुलाधर, शान्ति ठटाल, सत्य–स्वरुप र प्रकाश सपुतको रहेको छ।फिल्मको वितरण आर फिल्मसले गर्नेछ भने डिजिटल अधिकार ओएसआरले लिइसकेको छ।
यो फिल्म साहित्यकार गुरुप्रसाद मैनालीको कथा संग्रह ‘नासो’मा समावेश ‘परालको आगो’ कथामा आधारित हो। यही कथामा आधारित भएर करिब ४५ वर्षअघि प्रताप सुब्बाले पनि फिल्म निर्देशन गरेका थिए।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.