नयाँ वर्षमा सानेको नयाँ फिल्म ‘गंगारानी’ घोषणा

नमस्ते चितवन

मङ्गलबार, बैशाख ०१, २०८३ मा प्रकाशित

काठमाडौँ। लेखक तथा निर्देशक राजबहादुर साने ले नयाँ वर्ष २०८३ तथा आफ्नो जन्मदिनको अवसर पारेर नयाँ चलचित्र गंगारानी निर्माणको घोषणा गरेका छन्।

आहा फिल्म्सको ब्यानरमा निर्माण हुने यो चलचित्र आगामी जेठको अन्त्यतिर छायांकनमा जाने तयारीमा रहेको छ। प्रेमकथामा आधारित फिल्मका कलाकार तथा प्राविधिक टिम भने अझै अन्तिम टुंगो लाग्न बाँकी रहेको निर्देशक सानेले जानकारी दिएका छन्।

घोषणासँगै सार्वजनिक गरिएको थिम पोस्टरमा गिटार बोकेको एक युवक र गाडीमा आड लिएकी एक युवती देखिन्छन्। निर्देशकका अनुसार चलचित्रमा गरिब युवक र धनी युवतीबीचको प्रेमकथा प्रस्तुत गरिनेछ।

निर्देशक सानेले यसअघि पाठशाला, बुलाकी लगायतका फिल्ममार्फत आफूलाई स्थापित गरिसकेका छन्। ‘बुलाकी’बाट उनले उत्कृष्ट पटकथातर्फ राष्ट्रिय पुरस्कार समेत जितेका थिए।