काठमाडौं । आगामी जेठ १ गतेबाट प्रदर्शनमा आउन लागेको नेपाली चलचित्र एक मुठ्ठी बादलमा अभिनेता अविरल प्रताप अधिकारी परिवारको सबैभन्दा कान्छो सदस्यका रूपमा देखिएका छन्। रोचक कुरा के भने, चलचित्रको निर्माण प्रक्रिया सुरु हुँदा सबैभन्दा पहिले अडिसन दिने कलाकार पनि अविरल नै थिए।
अविरलका अनुसार उनले १७ वर्षको उमेरमा अभिनयको कुनै अनुभवबिना दुई पृष्ठको दृश्य आफ्नो बुझाइअनुसार अभिनय गरेर पठाएका थिए। निर्देशक सहारा शर्माले ‘पछि खबर गर्छौं’ भनेपछि उनले करिब पाँच वर्ष प्रतीक्षा गर्नुपरेको थियो। पुनः अडिसनपछि मात्रै उनले फिल्ममा अभिनय गर्ने अवसर पाए।
उनले चलचित्रमा छनोट भएको दिनलाई जीवनकै अविस्मरणीय क्षणका रूपमा सम्झिएका छन्। ‘एक मुठ्ठी बादल’कै सुटिङका क्रममा पोखरा जाँदा उनले पहिलो पटक हवाई यात्रा गरेका थिए। अभिनय सपना पूरा हुनुका साथै पहिलो पटक प्लेन चढ्ने अनुभवले यो प्रोजेक्टलाई अझ विशेष बनाएको उनले बताएका छन्।
कलात्मक परिवारबाट आएका अविरल चर्चित कवि तथा गीतकार क्षेत्रप्रताप अधिकारीका नाति तथा कार्यक्रम निर्देशक अमनप्रताप अधिकारीका छोरा हुन्। पारिवारिक विरासतलाई पछ्याउँदै उनले नाटक हुँदै चलचित्र क्षेत्रमा प्रवेश गरेका हुन्।
फिल्ममा घरको एक्लो छोरो तथा दिदीहरूको प्रिय भाइको भूमिकामा देखिएका अविरलले वास्तविक जीवन र पर्दाको चरित्रबीच फरक अनुभव रहेको बताएका छन्। यद्यपि दिदीसँगको आफ्नै सम्बन्धका कारण चलचित्रको दिदी–भाइ सम्बन्धलाई आत्मसात गर्न सहज भएको उनको भनाइ छ।
अविरलका अनुसार ‘एक मुठ्ठी बादल’को कथा नेपालका अधिकांश परिवारसँग जोडिन सक्ने खालको छ। उनले फिल्मका हरेक पात्र दर्शकको आफ्नै परिवारको सदस्यजस्तो लाग्ने दाबी गरेका छन्।
सहारा शर्माको लेखन तथा निर्देशनमा बनेको यस चलचित्रमा आँचल शर्मा, निशा शर्मा, शेखर चापागाईँ, उषा रजक, मनिष निरौला, गौरव विष्टलगायत कलाकारहरूको अभिनय रहेको छ।
परिवार, सम्बन्ध र भावनात्मक यथार्थलाई केन्द्रमा राखेर निर्माण गरिएको ‘एक मुठ्ठी बादल’प्रति दर्शकमाझ उत्सुकता बढ्दो छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.