कार्यक्रममा प्रेस सेन्टरका अग्रज पत्रकार चिन्तामणि पौडेल ले सहिद कृष्णसेन ‘इच्छुक’को जीवन, संघर्ष र पत्रकारिता क्षेत्रका योगदानबारे जानकारी दिएका थिए। उनले इच्छुकले जनताको आवाजलाई सशक्त रूपमा उठाएको उल्लेख गर्दै उनको विचार आज पनि सान्दर्भिक रहेको बताए।

त्यसैगरी नेकपा भरतपुर महानगर अध्यक्ष तथा बागमती प्रदेश सदस्य सुमन सापकोटा ‘ईश्वर’ले सहिद कृष्णसेन ‘इच्छुक’ले देखाएको मार्गमा पत्रकारहरू अघि बढ्नुपर्ने धारणा व्यक्त गरे। उनले सत्य र जनताको पक्षमा उभिने पत्रकारिता नै इच्छुकप्रतिको सच्चा सम्मान हुने बताए।

कार्यक्रममा नेपाल पत्रकार महासंघ उपाध्यक्ष दिपेन्द्र अधिकारी, प्रेस युनियन अध्यक्ष अनिल ढकाल, प्रेस चौतारी उपाध्यक्ष रामकान्त पौडेल तथा प्रेस सेन्टर नेपाल चितवनका अध्यक्ष राजेन्द्र आचार्य लगायतले शुभकामना मन्तव्य व्यक्त गरेका थिए।

यसै अवसरमा सहिद कृष्णसेन ‘इच्छुक’ स्मृति चौबिस कोठीमा दीप प्रज्वलन कार्यक्रम पनि सम्पन्न गरिएको थियो। कार्यक्रममा सहभागीहरूले सहिद इच्छुकप्रति श्रद्धाञ्जली अर्पण गर्दै उनको विचार र योगदानलाई स्मरण गरेका थिए।

२०५९ साल जेठ ६ गते तत्कालीन राज्य पक्षद्वारा पक्राउ परेका इच्छुकको हिरासतमा रहेका बेला जेठ १३ गते मृत्यु भएको समाचार सार्वजनिक गरिएको थियो। उनको मृत्युबारे व्यापक प्रश्न उठेका थिए र मानवअधिकारवादी, पत्रकार तथा नागरिक समाजले यसलाई हिरासतमा भएको यातनाको परिणाम भएको आरोप लगाएका थिए। त्यसयता जेठ १३ गतेलाई कृष्णसेन ‘इच्छुक’ स्मृति दिवसका रूपमा विभिन्न कार्यक्रम गरी मनाउने परम्परा रहँदै आएको छ।