काठमाडौं, जेठ १८
अभिनेता उत्तम प्रधान र अभिनेत्री निरुता सिंह अभिनीत चलचित्र ‘सारथी’ को म्याग्दीस्थित गुर्जा खानी क्षेत्रमा गरिएको छायांकन सम्पन्न भएको छ। गत वैशाख १५ गतेबाट सुरु भएको छायांकनको मुख्य चरण एक महिनाभित्र पूरा भएको निर्माण टिमले जनाएको छ।
निर्देशक कुमार गजुरेलका अनुसार चलचित्रको अब काठमाडौंमा एक दिनको मात्र छायांकन बाँकी रहेको छ। उक्त दृश्य खिचेपछि चलचित्र पोस्ट–प्रोडक्सन चरणमा प्रवेश गर्नेछ। पोस्ट–प्रोडक्सनको काम सम्पन्न भएपछि प्रदर्शन मिति घोषणा गरिने निर्देशक गजुरेलले जानकारी दिए।
म्याग्दीको दुर्गम तर प्राकृतिक सौन्दर्यले भरिपूर्ण गुर्जा क्षेत्रमा छायांकन सम्पन्न गरेर निर्माण टिम उत्साहित हुँदै काठमाडौं फर्किएको छ। चलचित्रको विशेष आकर्षणका रूपमा करिब दुई दशकपछि वरिष्ठ कलाकार उत्तम प्रधान र निरुता सिंहको पुनर्मिलनलाई हेरिएको छ। लामो अन्तरालपछि यी दुई कलाकार पुनः एउटै पर्दामा देखिन लागेकाले चलचित्रप्रति दर्शक र चलचित्रकर्मीको विशेष चासो रहेको निर्माण पक्षको दाबी छ।
सामाजिक कथावस्तुमा आधारित चलचित्रले गुर्जा क्षेत्रको मौलिक संस्कृति, परम्परागत जीवनशैली, ढुंगा–माटोका घर, छन्त्याल तथा दलित समुदायको जनजीवन र गुर्जा–चुरेन हिमालको प्राकृतिक सौन्दर्यलाई पर्दामा उतारेको छ। निर्देशक गजुरेलका अनुसार चलचित्रले गुर्जा क्षेत्रको पर्यटन प्रवर्द्धनमा समेत टेवा पुर्याउने अपेक्षा गरिएको छ।
चलचित्रमा उत्तम प्रधान र निरुता सिंहसँगै मुकुन्द श्रेष्ठ, राजेन्द्र केसी, गिरी विश्वकर्मा, गायत्री जोशी, मदन थापा, सम्रान्त थापा, मिलन खड्का, रश्मि गुरुङ, कल्पना थापा, आशा विश्वकर्मा, सन्तोष दाहाल, विप्लव खड्का, सागर कँडेल र धिरेन मोक्तानलगायत कलाकारहरूको अभिनय रहेको छ।
किम्भे प्रोडक्सन र धीरज इन्फिनिटी फिल्म्सको संयुक्त ब्यानरमा निर्माण भइरहेको चलचित्रका निर्माता तारा थापा ‘किम्भे’ र सौर्यल थापा हुन्। धीरज तामाङ र बेकबहादुर विश्वकर्मा सह–निर्माता, प्रदीप रायमाझी र रदिप श्रेष्ठ कार्यकारी निर्माता तथा अमिर केसी लाइन प्रोड्युसर रहेका छन्। चलचित्रको छायांकन संकल्प भुजेलले गरेका हुन्।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.