मंसिर ११ मा रिलिज हुने भयो सस्पेन्स थ्रिलर ‘स्त्री’

नमस्ते चितवन

बुधबार, जेठ २०, २०८३ मा प्रकाशित

काठमाडौं , जेठ २० । चलचित्र स्त्रीको निर्माण कार्य सम्पन्न भएसँगै प्रदर्शन मिति घोषणा गरिएको छ। निर्माण टिमले सोमबार आधिकारिक पोस्टर सार्वजनिक गर्दै चलचित्रलाई आगामी मंसिर ११ गतेदेखि देशभर प्रदर्शनमा ल्याइने जानकारी दिएको हो।

समीर राईको निर्माण तथा जीवन शाहीको निर्देशनमा बनेको चलचित्र टौवा क्रियशनको ब्यानरमा निर्माण गरिएको हो। सार्वजनिक पोस्टरमा चलचित्रका प्रमुख कलाकारहरू फरक–फरक भावभंगिमा र अवतारमा देखिएका छन्, जसले कथाप्रति दर्शकको जिज्ञासा बढाएको छ।

पोस्टरमा रातो रङको प्रभावशाली प्रयोग गरिएको छ, जसले चलचित्र सस्पेन्स र थ्रिलर कथावस्तुमा आधारित रहेको संकेत गर्छ। चलचित्रमा दीपाश्री निरौला, प्रमोद अग्रहरी, सलोन बस्नेत, नम्रता श्रेष्ठ, रिस्ता बस्नेत र दिनेश डीसी मुख्य भूमिकामा छन्।

त्यस्तै, चलचित्रमा सुरवीर पण्डित, नरेन्द्र थापा, देव सरकार, रश्मी भट्ट, अस्मिता बस्नेत, काजल कर्ण, अञ्जु सुनार, रामबाबु हुमागाईं, कल्पना श्रेष्ठ र समीर लामा लगायत कलाकारहरूको पनि अभिनय रहेको छ।

प्राविधिक पक्षमा चलचित्रका रामशरण उप्रेती डीओपी रहेका छन् भने बाबुल गिरीको संगीत, देव महर्जन र शंकर महर्जनको एक्सन निर्देशन, बन्दे प्रसादको सम्पादन तथा एलिस कार्कीको ब्याकग्राउन्ड स्कोर रहेको छ।

चलचित्रको नेपाल वितरण अधिकार एप्पल इन्टरटेन्मेन्ट, रिच इन्टरटेन्मेन्ट र एफडी कम्पनीले लिएका छन्। निर्माण पक्षका अनुसार चलचित्रले दर्शकलाई रहस्य, रोमाञ्च र मनोरञ्जनको फरक स्वाद दिने अपेक्षा गरिएको छ।