काठमाडौं, जेठ २६
रुपन्देहीको सिद्धार्थनगरस्थित भाटभटेनी सुपरस्टोरमा अत्याधुनिक सुविधा सम्पन्न आईएनआई सिनेमाज औपचारिक रूपमा सञ्चालनमा आएको छ। भाटभटेनीको पाँचौँ तलामा स्थापना गरिएको मल्टिप्लेक्स गत शुक्रबारदेखि दर्शकका लागि खुला गरिएको हो।
बुद्ध जन्मस्थल लुम्बिनीको प्रवेशद्वार मानिने भैरहवामा पछिल्ला वर्षहरूमा पर्यटन, व्यापार तथा सेवा क्षेत्र तीव्र गतिमा विस्तार भइरहेका बेला आधुनिक सिनेमा पूर्वाधारका रूपमा आईएनआई सिनेमाज थपिएको छ। यसले स्थानीय दर्शकलाई अन्तर्राष्ट्रियस्तरको सिनेमा अनुभव प्रदान गर्ने अपेक्षा गरिएको छ।
हलका संरक्षक तथा व्यवसायी दीपक कुँवरले भैरहवा द्रुत रूपमा विकसित हुँदै गएको व्यापारिक तथा पर्यटन केन्द्र भएकाले आधुनिक मल्टिप्लेक्सको आवश्यकता महसुस गर्दै लगानी गरिएको बताए। उनका अनुसार यसले मनोरञ्जन क्षेत्रसँगै स्थानीय अर्थतन्त्र र रोजगारी सिर्जनामा समेत योगदान पुर्याउनेछ।
कम्पनीका निर्देशक आभाष कुँवरले विदेशमा हासिल गरेको अनुभवलाई नेपालमा प्रयोग गर्दै आधुनिक मनोरञ्जन उद्योगको विकासमा योगदान दिने उद्देश्यले नयाँ शाखा सञ्चालन गरिएको जानकारी दिए। उनले युवाहरूलाई स्वदेशमै अवसर सिर्जना गर्न सकिने सन्देशसमेत दिन खोजिएको बताए।
सञ्चालकका अनुसार मल्टिप्लेक्समा दुईवटा अत्याधुनिक अडिटोरियम रहेका छन्। प्रत्येक हलमा १९८ सिट क्षमता रहेको छ भने एकैपटक ३९६ दर्शकले सिनेमा हेर्न सक्ने व्यवस्था गरिएको छ।
हलमा बेल्जियममा निर्मित बार्को लेजर प्रोजेक्टर, १६ च्यानलको डीटीएस–एक्स इमर्सिभ साउन्ड सिस्टम तथा आधुनिक सिटिङ सुविधा जडान गरिएको छ। कम्पनीका सञ्चालक सुरेन्द्र थापाका अनुसार यी प्रविधिले दर्शकलाई विश्वस्तरीय सिनेमा अनुभव दिलाउनेछन्।
सुरक्षालाई प्राथमिकता दिँदै आगलागी प्रतिरोधी सामग्री, आकस्मिक बहिर्गमन मार्ग तथा अन्य आवश्यक सुरक्षा पूर्वाधारसमेत तयार गरिएको जनाइएको छ।
सन् २०१९ मा स्थापना भएको आईएनआई सिनेमाजले हाल काठमाडौं, बुटवल, सिमरा, नवलपुरलगायत विभिन्न स्थानमा सेवा दिँदै आएको छ। भैरहवामा नयाँ शाखा सञ्चालन भएसँगै कम्पनीको कुल स्क्रिन संख्या १३ पुगेको छ।
व्यवस्थापनले भैरहवा, तिलोत्तमा, बुटवल तथा आसपासका क्षेत्रका दर्शकबाट सकारात्मक साथ र सहयोग प्राप्त हुने विश्वास व्यक्त गरेको छ। कम्पनीका अनुसार टिकट वेबसाइट तथा विभिन्न डिजिटल भुक्तानी माध्यमबाट समेत खरिद गर्न सकिने व्यवस्था मिलाइएको छ।
नयाँ मल्टिप्लेक्सको सञ्चालनसँगै भैरहवा तथा लुम्बिनी प्रदेशको मनोरञ्जन र पर्यटन क्षेत्रलाई थप ऊर्जा मिल्ने अपेक्षा गरिएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.