काठमाडौं । सम्पत्ति शुद्धीकरण अनुसन्धान विभाग र नेपाल प्रहरीको केन्द्रीय अनुसन्धान ब्युरो (सीआईबी) ले गरेको लामो अनुसन्धानपछि चर्चित उद्योगी तथा व्यवसायीहरूमाथि ठगी, बैंकिङ कसुर, धितोपत्र उल्लंघन र आर्थिक अनियमिततासम्बन्धी विभिन्न मुद्दा दायर भएका छन्।

व्यवसायी दिपक भट्ट, सुलभ अग्रवाल र शेखर गोल्छासहित दर्जनौं व्यक्तिविरुद्ध जिल्ला अदालत काठमाडौं, उच्च अदालत पाटन तथा विशेष अदालतमा छुट्टाछुट्टै अभियोगपत्र दर्ता गरिएको हो।

बीमा ऐन, २०७९ विपरीत आर्थिक अनियमितता गरेको आरोपमा शेखर गोल्छा, दिपक भट्ट, सुलभ अग्रवालसहित ४२ जनालाई प्रतिवादी बनाइएको छ। सो प्रकरणमा नेपाल बीमा प्राधिकरणका तत्कालीन अध्यक्षहरू शरद ओझा र मदन दाहालसमेत मुछिएका छन्।

जिल्ला अदालत काठमाडौंमा दायर गरिएको मुद्दाअनुसार हिमालयन रिइन्स्योरेन्स लिमिटेडसँग सम्बन्धित शेखर गोल्छासहित १० जनाविरुद्ध २ अर्ब ७३ करोड ३३ लाख रुपैयाँभन्दा बढी बिगो दाबी गरिएको छ। यस्तै, भृकुटी ब्रोकिङ कम्पनीसँग आबद्ध सन्दिप चाचान अग्रवाल, सुधा कर्ण, राजिव ठाकुर र सुलभ अग्रवालसहितका प्रतिवादीविरुद्ध ३ अर्ब ७३ करोड ८५ लाख रुपैयाँभन्दा बढी बिगो माग गरिएको छ।

नेपाल माइक्रो इन्स्योरेन्स कम्पनीका अध्यक्ष आशिष श्रेष्ठसहित ९ जनाविरुद्ध १६ करोड १७ लाख रुपैयाँभन्दा बढी बिगो दाबी गरिएको छ भने दिपक भट्टविरुद्ध मात्रै २ अर्ब ८९ करोड २० लाख रुपैयाँभन्दा बढी बिगो कायम गरिएको छ।

यसैबीच, धितोपत्रसम्बन्धी ऐन, २०६३ उल्लंघन गरेको आरोपमा ८१ जनाविरुद्ध जिल्ला अदालत काठमाडौंमा अर्को मुद्दा दायर गरिएको छ। त्यस्तै, उच्च अदालत पाटनमा दिपक भट्ट, शाहिल अग्रवाल, सुलभ अग्रवाल र शंकरलाल अग्रवालविरुद्ध बैंकिङ कसुरअन्तर्गत मुद्दा दर्ता गरिएको छ, जसमा ४२ करोड १४ लाख रुपैयाँभन्दा बढी बिगो दाबी गरिएको छ।

यता, सम्पत्ति शुद्धीकरण अनुसन्धान विभागले दिपक भट्ट र अग्रवाल समूहविरुद्ध विशेष अदालतमा सम्पत्ति शुद्धीकरणसम्बन्धी छुट्टै मुद्दासमेत दायर गरेको छ।

लामो समयदेखि अनुसन्धानको दायरामा रहेका प्रभावशाली व्यवसायीहरूमाथि एकैसाथ यति ठूलो परिमाणमा कानुनी कारबाही अघि बढाइएपछि व्यावसायिक तथा बैंकिङ क्षेत्रमै व्यापक चर्चा सुरु भएको छ। अदालतमा मुद्दा दर्ता भएसँगै अब यी बहुचर्चित प्रकरणहरूको कानुनी परीक्षण अगाडि बढ्ने भएको छ।