काठमाडौं, जेठ ३१ । फिफा विश्वकप–२०२६ अन्तर्गतको खेलमा कतारले अन्तिम क्षणमा गोल गर्दै स्विट्जरल्यान्डसँग १–१ को बराबरी खेलेको छ।
क्यालिफोर्नियाको लेभाइस स्टेडियममा सम्पन्न खेलमा स्विट्जरल्यान्डले पहिलो हाफमा अग्रता लिए पनि अन्त्यतिर दबाब झेल्दै एक अंकमा चित्त बुझाउन बाध्य भयो।
खेलको १३औँ मिनेटमा कतारका गोलरक्षक महमुद अबुनादाले ब्रिल एम्बोलोलाई फउल गरेपछि स्विट्जरल्यान्डले पेनाल्टीको अवसर पाएको थियो। उक्त अवसरलाई एम्बोलोले १७औँ मिनेटमा सदुपयोग गर्दै टोलीलाई अग्रता दिलाए।
त्यसपछि स्विट्जरल्यान्डले खेलमा नियन्त्रण कायम राख्दै थप गोलका अवसर सिर्जना गर्यो। तर कतारका खेलाडीहरूले पनि हार नमानी लगातार दबाब सिर्जना गरे। दुवै टोलीले गोलका केही उत्कृष्ट अवसर पाए पनि गोलरक्षकहरूको उत्कृष्ट प्रदर्शनका कारण स्कोर थप बदलिन सकेन।
जित नजिक पुगेको स्विट्जरल्यान्डलाई इन्जुरी समयमा ठूलो धक्का लाग्यो। अतिरिक्त समयको पाँचौँ मिनेटमा बुआलेम खुखीले हेडमार्फत शानदार गोल गर्दै कतारलाई बराबरी दिलाए। उक्त गोलसँगै खेल १–१ को बराबरीमा समाप्त भयो।
स्पेनी प्रशिक्षक जुलेन लोपेटेगुईको नेतृत्वमा रहेको कतारले अन्तिम समयसम्म संघर्ष गर्दै महत्वपूर्ण अंक जोगाएको हो। सन् २०२२ को विश्वकपमा निराशाजनक प्रदर्शन गरेको कतारले यसपटक भने आत्मविश्वासपूर्ण सुरुआत गरेको संकेत दिएको छ।
यता प्रशिक्षक मुराट याकिनको स्विट्जरल्यान्डले उत्कृष्ट खेल प्रदर्शन गरे पनि अन्तिम समयमा गोल खाँदा पूर्ण तीन अंक हात पार्ने अवसर गुमाएको छ। बराबरीसँगै दुवै टोलीले प्रतियोगिताको सुरुआती खेलबाट एक–एक अंक बटुलेका छन्।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.