काठमाडौं । राष्ट्रिय चलचित्र पुरस्कार विजेता निर्देशक राजबहादुर सानेको आगामी चलचित्र ‘गंगा रानी’मा नवोदित कलाकार रोशन केसी मुख्य अभिनेताका रूपमा अनुबन्धित भएका छन्। करिब ५०० भन्दा बढी आवेदकमध्ये छनोट हुँदै उनले आफ्नो पहिलो चलचित्रमै मुख्य भूमिका हात पारेका हुन्।
यसअघि नै अभिनेत्री वर्षा सिवाकोटी मुख्य भूमिकाका लागि अनुबन्धित भइसकेकी छन्। चलचित्रमा रोशन र वर्षाको जोडी पहिलोपटक ठूलो पर्दामा देखिने भएको छ।
केही म्युजिक भिडियोमार्फत अभिनय यात्रा सुरु गरेका रोशनले उत्कृष्ट कथा र अनुभवी टिमसँग काम गर्ने अवसर पाएको भन्दै चलचित्रमार्फत डेब्यु गर्न पाउँदा उत्साहित रहेको बताएका छन्।
निर्माण टिमले वर्षा अनुबन्धित भएसँगै ४ अभिनेता र ४ अभिनेत्रीका लागि अडिसन आह्वान गरेको थियो। सोही अडिसनबाट रोशन मुख्य अभिनेताका रूपमा छनोट भएका हुन्। निर्देशक सानेका अनुसार प्राप्त आवेदन र अडिसनका आधारमा थप ३ अभिनेता तथा ३ अभिनेत्री छनोट गर्ने प्रक्रिया अन्तिम चरणमा पुगेको छ।
‘अडिसनमा आएका प्रतिभामध्ये पात्रसँग मेल खाने कलाकारको छनोट गरिरहेका छौं। बाँकी कलाकारको नाम पनि चाँडै सार्वजनिक गर्नेछौं,’ निर्देशक सानेले बताए।
आहा फिल्म्सको प्रस्तुति रहने चलचित्रका निर्माता कमलप्रसाद शर्मा हुन्। साने स्वयंको लेखन तथा निर्देशनमा बन्ने चलचित्रको छायांकन आगामी भदौको दोस्रो सातादेखि सुरु गर्ने तयारी गरिएको छ।
निर्देशक सानेले यसअघि ‘पाठशाला’, ‘द रिटर्न हिरो’, ‘लाटी’, ‘वृन्दावन’, ‘बिरंगना’, ‘डोली’, ‘गुड फ्रेण्ड’, ‘सिल्ली फो’, ‘बुलाकी’, ‘जुना’ र ‘सिटामोल’ जस्ता चलचित्र निर्देशन गरिसकेका छन्।
यसैबीच, आहा फिल्म्सकै ब्यानरमा निर्माण भएको र सानेकै निर्देशन रहेको चलचित्र ‘लज्जावती’ आगामी साउन २९ गतेदेखि प्रदर्शनमा आउने तयारीमा रहेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.