काठमाडौं । मिकेल ओयार्साबालको दुई गोल र लामिन यामालको उत्कृष्ट प्रदर्शनमा स्पेनले फिफा विश्वकपमा साउदी अरेबियालाई ४–० ले पराजित गरेको छ। पहिलो खेलमा केप भर्डेसँग बराबरी खेलेको स्पेनले यसपटक प्रभावशाली पुनरागमन गर्दै नकआउट चरणतर्फ बलियो कदम चालेको हो।
स्पेनले खेलको सुरुआतदेखि नै साउदी अरेबियामाथि दबाब बनाएको थियो। खेलको १०औँ मिनेटमा ओयार्साबालको पासमा यामालले गोल गर्दै टोलीलाई अग्रता दिलाए। त्यसपछि ओयार्साबालले लगातार दुई गोल थप्दै पहिलो हाफमै स्पेनलाई ३–० को आरामदायी स्थितिमा पुर्याए।
पहिलो हाफमा ह्याट्रिकको अवसर पाए पनि ओयार्साबाल त्यसबाट वञ्चित भए। उनका एक प्रहार क्रसबारमा लाग्दा अर्को अवसर लक्ष्यभन्दा थोरैले बाहिरिएको थियो।
दोस्रो हाफमा पनि स्पेनको दबाब कायम रह्यो। ४९औँ मिनेटमा म्यार्क कुकुरेलाको प्रहार गोलकिपर मोहम्मद अलोवाइसले रोक्ने प्रयास गरे पनि बल डिफेन्डर हसन अल–ताम्बाक्तीको शरीरमा लाग्दै आत्मघाती गोलमा परिणत भयो। यही गोलले स्पेनको जितलाई ४–० मा पुर्यायो।
खेलपछि स्पेनले महत्वपूर्ण तीन अंक जोड्दै समूह चरणबाट अघि बढ्ने सम्भावना बलियो बनाएको छ। अब अन्तिम खेलमा उरुग्वेविरुद्ध बराबरी नतिजा निकाले पनि स्पेन नकआउट चरणमा पुग्नेछ।
उता लगातार दोस्रो खेलमा निराशाजनक नतिजा बेहोरेको साउदी अरेबियाले भने अर्को चरणको सम्भावना कायम राख्न केप भर्डेविरुद्ध जित निकाल्नै पर्ने दबाबमा परेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.