काठमाडौं । पोर्चुगलका कप्तान क्रिस्टियानो रोनाल्डोले फिफा विश्वकप इतिहासमा नयाँ अध्याय थप्दै लगातार ६ फरक संस्करणमा गोल गर्ने पहिलो खेलाडी बनेका छन्। उज्बेकिस्तानविरुद्ध दुई गोल गर्दै उनले यो दुर्लभ उपलब्धि हासिल गरेका हुन्।
विश्वकप २०२६ अन्तर्गत बुधबार सम्पन्न खेलमा पोर्चुगलले उज्बेकिस्तानलाई ५–० को फराकिलो अन्तरले पराजित गर्यो। खेलको छैटौं मिनेटमै जोआओ कान्सेलोको पासमा गोल गर्दै रोनाल्डोले टोलीलाई अग्रता दिलाएका थिए।
३९औं मिनेटमा ब्रुनो फर्नान्डेसको उत्कृष्ट पासलाई गोलमा परिणत गर्दै उनले व्यक्तिगत दोस्रो गोल गरे र पोर्चुगलको अग्रता थप बलियो बनाए। उत्कृष्ट प्रदर्शनपछि रोनाल्डो खेलको ‘म्यान अफ द म्याच’ घोषित भए।
४१ वर्षीय रोनाल्डो विश्वकपमा गोल गर्ने दोस्रो सबैभन्दा बढी उमेरका खेलाडी पनि बनेका छन्। यो सूचीमा क्यामरुनका रोजर मिल्ला शीर्ष स्थानमा छन्, जसले १९९४ को विश्वकपमा ४२ वर्षको उमेरमा गोल गरेका थिए।
रोनाल्डोले २००६, २०१०, २०१४, २०१८, २०२२ र २०२६ गरी लगातार ६ संस्करणमा गोल गर्दै इतिहास रचेका हुन्। यसअघि यस्तो उपलब्धि कुनै पनि खेलाडीले हासिल गर्न सकेका थिएनन्।
मंगलबारका दुई गोलसँगै रोनाल्डोको विश्वकप गोल संख्या १० पुगेको छ। यससँगै उनले पोर्चुगलका महान् स्ट्राइकर युसेबियोको ९ गोलको कीर्तिमानलाई उछिनेका छन्।
यस्तै, अन्तर्राष्ट्रिय फुटबलमा उनको कुल गोल संख्या १४५ पुगेको छ, जुन पुरुष फुटबल इतिहासकै सर्वाधिक हो। उज्बेकिस्तानविरुद्धको खेल उनको अन्तर्राष्ट्रिय करियरको २३०औं खेलसमेत बनेको छ।
विश्व फुटबलका महान् खेलाडीमध्ये एक मानिने रोनाल्डोले उमेर केवल अंक मात्र भएको प्रमाणित गर्दै विश्वकपमा अर्को अविस्मरणीय कीर्तिमान आफ्नो नाममा लेखाएका छन्।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.