इङ्ल्याण्ड र घाना गोलरहित बराबरीमा, नकआउटको दौड रोचक बन्दै

नमस्ते चितवन

बुधबार, असार १०, २०८३ मा प्रकाशित

काठमाडौँ । फिफा विश्वकप २०२६ अन्तर्गत समूह ‘एल’को प्रतिस्पर्धात्मक खेलमा इङ्ल्याण्ड र घानाले गोलरहित बराबरी खेल्दै अंक बाँडेका छन्। दुवै टोलीले गोलका अवसर सिर्जना गरे पनि त्यसलाई सदुपयोग गर्न नसक्दा खेल ०–० को बराबरीमा टुंगिएको हो।

समूह चरणको दोस्रो खेलमा दुवै टोली सावधानीपूर्वक प्रस्तुत भएका थिए। इङ्ल्याण्डले बल नियन्त्रणमा पकड जमाए पनि घानाको सुदृढ रक्षापङ्क्ति भेद्न सकेन। यता, घानाले पनि काउन्टर अट्याकमार्फत केही अवसर बनाएको भए पनि गोल गर्न असफल रह्यो।

यसअघि पहिलो खेलमा इङ्ल्याण्डले क्रोएसियालाई ४–२ गोलअन्तरले पराजित गरेको थियो भने घानाले पानामामाथि १–० को जित निकालेको थियो। दोस्रो खेल बराबरीमा सकिएसँगै दुवै टोलीले महत्वपूर्ण एक–एक अंक थपेका छन्।

अब समूह ‘एल’बाट अन्तिम ३२ मा स्थान बनाउने समीकरण अन्तिम खेलसम्म खुला रहने भएको छ। इङ्ल्याण्ड र घाना दुवैले आफ्नो अन्तिम खेलमा जित निकाल्दै नकआउट चरणको यात्रा सुनिश्चित गर्ने लक्ष्य राख्नेछन्।