काठमाडौं । अभिनेता जितु नेपालको मुख्य भूमिका रहेको बहुप्रतीक्षित चलचित्र ‘कार्की साइँला’ को नयाँ प्रदर्शन मिति घोषणा गरिएको छ। निर्माण पक्षले बुधबार आधिकारिक पोस्टर सार्वजनिक गर्दै चलचित्र आगामी असोज २ गते देशभर प्रदर्शनमा आउने जानकारी दिएको हो।
यसअघि साउन १ गते प्रदर्शन गर्ने तयारी भए पनि वितरकसँगको परामर्श र प्रदर्शन रणनीतिअनुसार चलचित्रको रिलिज मिति सारिएको निर्माण टिमले जनाएको छ।
नयाँ पोस्टरमा अभिनेता जितु नेपाल र अभिनेत्री प्रियना आचार्य (मुन्नी)लाई रोमान्टिक अवतारमा प्रस्तुत गरिएको छ। पोस्टरमा देखिएको उनीहरूको प्रेमिल भावले चलचित्रमा प्रेम, भावना र सम्बन्धका पक्षहरू महत्वपूर्ण रूपमा समेटिएको संकेत गर्छ। यद्यपि चलचित्रको मुख्य कथावस्तुबारे थप जानकारी भने आगामी प्रचार सामग्रीमार्फत सार्वजनिक गरिने बताइएको छ।
शीर्षकबाटै अनुमान गर्न सकिने ‘कार्की साइँला’ एक भरियाको जीवन, संघर्ष र यात्राको कथामा आधारित चलचित्र हो। चलचित्रको छायांकन पूर्वी नेपालका रमणीय स्थल धनकुटा, बराहक्षेत्र, चतरा तथा आसपासका क्षेत्रमा गरिएको छ।
राजेन्द्र बस्नेतको निर्देशनमा तयार भएको चलचित्रमा जितु नेपाल र प्रियना आचार्यसँगै सुशील पोखरेल, बीरेन्द्र सिंह कुशवाह, मान्शी शर्मा, मनिल तामाङ, रेणुका आचार्य, दिप्सन लिम्बु, रोदा राई तथा कमल देवकोटालगायत कलाकारहरूको अभिनय रहेको छ।
कर्णबहादुर फिल्मस् प्रालिको ब्यानरमा निर्माण भएको चलचित्रका निर्माता बालकुमार राई हुन् भने कृष्ण भगत चाम्लिङ प्रस्तुतकर्ताका रूपमा रहेका छन्। चलचित्रका कार्यकारी निर्माता अनन्त राई हुन्।
सबिन अधिकारी र शङ्कर धितालको लेखन रहेको चलचित्रमा रोजल थापा मुख्य सहायक निर्देशकका रूपमा रहेका छन्। डम्बर राईको छायांकन, किरण दाहालको द्वन्द्व निर्देशन, दिप्सन लिम्बुको संगीत तथा सिबी भण्डारीको प्रोडक्सन व्यवस्थापन रहेको छ।
व्यावसायिक प्रदर्शनका लागि काठमाडौं उपत्यकाभित्र काफिया फिल्म्समार्फत गोविन्द शाहीले वितरण गर्नेछन् भने उपत्यकाबाहिरको जिम्मेवारी कुबेर फिल्म्सले लिएको छ।
रोचक कथावस्तु, पूर्वी नेपालको सुन्दर लोकेसन र जितु नेपालको फरक भूमिकाका कारण ‘कार्की साइँला’प्रति दर्शकमाझ उत्सुकता बढ्दै गएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.