असोज ९ मा रिलिज हुने ‘हन्टर’को प्रदर्शन मिति घोषणा, फेस-अफ पोस्टरले बढायो चर्चा

नमस्ते चितवन

शुक्रबार, असार १२, २०८३ मा प्रकाशित

काठमाडौं । जीवन सिंहको लेखन तथा निर्देशनमा बनेको नेपाली चलचित्र ‘हन्टर’ आगामी असोज ९ गते (सेप्टेम्बर २५) देखि देशभर प्रदर्शनमा आउने भएको छ। निर्माण पक्षले बिहीबार चलचित्रको नयाँ ‘फेस-अफ’ पोस्टर सार्वजनिक गर्दै प्रदर्शन मिति घोषणा गरेको हो।

निर्देशक जीवन सिंहको यो पहिलो निर्देशकीय चलचित्र हो। सार्वजनिक पोस्टरले चलचित्रको कथा, पात्र र द्वन्द्वबारे रोचक संकेत दिएको छ।

ट्राइडेन्ट कन्सेप्टले डिजाइन गरेको पोस्टरमा अभिनेता अरुण क्षेत्री र प्रकाश शाह आमनेसामने देखिएका छन्। प्रकाशको अनुहारमा देखिएको आक्रोश र अरुणको आँखामा झल्किएको प्रतिशोधले उनीहरूबीच हुने सशक्त भिडन्तलाई संकेत गरेको छ। पोस्टरले ‘हन्टर’ र ‘सिकार’बीचको संघर्ष नै कथाको केन्द्रमा रहेको आभास दिलाउँछ।

त्यसैगरी पोस्टरको तल्लो भागमा अरुण क्षेत्री र अभिनेत्री सुप्रज्ञा शर्मालाई रोमान्टिक शैलीमा प्रस्तुत गरिएको छ। यसले चलचित्रमा एक्सनसँगै प्रेमकथाले पनि महत्वपूर्ण स्थान पाएको देखाउँछ। निर्माण टिमका अनुसार कथामा प्रेम, द्वन्द्व र प्रतिशोध एकअर्कासँग गहिरोसँग जोडिएका छन्।

निर्देशक सिंहले ‘हन्टर’को कथा समाजका वास्तविक पात्र र घटनाबाट प्रेरित भएर तयार पारिएको बताए। उनका अनुसार चलचित्रले दर्शकलाई यथार्थसँग जोडिएको कथा प्रस्तुत गर्नेछ।

ट्राइडेन्ट कन्सेप्टको सहकार्यमा निर्माण भएको चलचित्रका निर्माता ममता सिंह, गोविन्द राज र राज ए. भट्ट हुन्। मनिष चन्द, युना शाही र सन्तोष आस्ना पाल सह–निर्माताका रूपमा रहेका छन् भने रोयल भीमसेन (भीमसेन शाही) कार्यकारी निर्माता हुन्।

चलचित्रमा अरुण क्षेत्री, प्रकाश शाह र सुप्रज्ञा शर्माका साथै गरिमा शर्मा, सरोज खनाल, रमेश बुढाथोकी, रुजा राउत, रोशनी दाहाल, गीता अधिकारी, सुरज भण्डारी, टेकराज शर्मा र लालबहादुर थापालगायत कलाकारको अभिनय रहेको छ।

चलचित्रको सम्पादन निर्देशक सिंह स्वयंले गरेका छन्। कृष्ण थापाको छायांकन, शुक्रराज शाहको द्वन्द्व निर्देशन, विक्रम स्वाँर र सञ्जय खिमजिमको कोरियोग्राफी तथा बाबुल गिरी, चक्र बम र महेश ताम्राकारको संगीत रहेको छ।

दसैंको पूर्वसन्ध्यामा प्रदर्शनमा आउन लागेको ‘हन्टर’ले एक्सन, प्रेम, इमोसन र सशक्त ड्रामाको संयोजनमार्फत दर्शकमाझ नयाँ स्वाद प्रस्तुत गर्ने निर्माण पक्षको विश्वास छ। चलचित्रको देशव्यापी वितरण आरआर फिल्म्सले गर्नेछ।

शुक्रबार, असार १२, २०८३ मा प्रकाशित