डेम्बेलेको ह्याट्रिकमा फ्रान्स समूह विजेता, नर्वेसँगै विश्वकपको नकआउट चरणमा

नमस्ते चितवन

शनिबार, असार १३, २०८३ मा प्रकाशित

काठमाडौं । उस्मान डेम्बेलेको शानदार ह्याट्रिक प्रेरित फ्रान्सले फिफा विश्वकप २०२६ अन्तर्गत समूह ‘आई’को अन्तिम खेलमा नर्वेलाई ४–१ ले पराजित गर्दै शतप्रतिशत नतिजासहित समूह विजेताका रूपमा नकआउट चरणमा प्रवेश गरेको छ।

अमेरिकाको बोस्टन स्टेडियममा सम्पन्न खेलमा फ्रान्सले सुरुदेखि नै आक्रामक प्रदर्शन गर्दै नर्वेमाथि स्पष्ट दबाब बनाएको थियो। लगातार तेस्रो जित निकालेसँगै फ्रान्सले समूह चरण ९ अंकका साथ टुंग्यायो। यसअघि फ्रान्सले सेनेगललाई ३–१ र इराकलाई ३–० ले हराएको थियो।

यद्यपि पराजित भए पनि ६ अंक जोडेको नर्वे समूह उपविजेताका रूपमा अन्तिम ३२ मा स्थान बनाउन सफल भयो। नर्वे २८ वर्षपछि विश्वकपको नकआउट चरणमा पुगेको हो।

फ्रान्सको जितमा उस्मान डेम्बेले नायक बने। उनले खेलको सातौं मिनेटमै गोल गर्दै टोलीलाई अग्रता दिलाए। त्यसपछि २०औं मिनेटमा व्यक्तिगत दोस्रो गोल गरे भने ३२औं मिनेटमा फेरि गोल गर्दै पहिलो हाफमै ह्याट्रिक पूरा गरे।

नर्वेका लागि २१औं मिनेटमा थेलो आसगार्डले गोल गर्दै टोलीलाई खेलमा फर्काउने प्रयास गरेका थिए। तर डेम्बेलेको तेस्रो गोलले फ्रान्सलाई पहिलो हाफमै ३–१ को बलियो अग्रता दिलायो।

दोस्रो हाफमा नर्वेले केही अवसर सिर्जना गरे पनि त्यसलाई सदुपयोग गर्न सकेन। ५०औं मिनेटमा योर्गन स्ट्रान्ड लार्सनले पेनाल्टीको अवसर पाए पनि त्यसलाई गोलमा परिणत गर्न असफल भए। खेलको इन्जुरी समयमा डिजायर डोएले अर्को गोल थपेपछि फ्रान्सले ४–१ को प्रभावशाली जित दर्ता गर्यो।

समूह ‘आई’को अर्को खेलमा सेनेगलले इराकलाई ५–० को फराकिलो अन्तरले हराउँदै प्रतियोगिताको सुखद अन्त्य गर्यो। तर जितका बाबजुद सेनेगल ३ अंकमै सीमित रहँदा नकआउट चरणमा पुग्न सकेन। इराक भने तीनै खेल हार्दै अंकविहीन अवस्थामा प्रतियोगिताबाट बाहिरियो।

समूह ‘आई’को अन्तिम अवस्था: