आफ्नो उमेर सार्वजनिक नगरे पनि जीवन र अभिनय दुवैमा आफू परिपक्व हुँदै गएको उनको भनाइ छ।

उनका अनुसार कान्तिपुर थिएटरमा मञ्चन भएको ‘मीरा’ नाटकले नै उनलाई फिल्मसम्म पुर्‍याउने बाटो खोलिदिएको थियो। सो नाटक हेरेपछि फिल्म ‘लालीबजार’ का निर्माता तथा निर्माण टिमले उनलाई अडिसनका लागि बोलाएको र विभिन्न चरण पार गरेपछि मुख्य भूमिकामा छनोट भएको उनले सुनाए।

“थियटरमा ‘मीरा’ नाटक गरिरहेको बेला प्रदीप भट्टराई सर, रबिन दाइ र जेबी दाइ नाटक हेर्न आउनुभएको थियो। त्यसपछि उहाँहरूले अडिसनका लागि बोलाउनुभयो। धेरै चरण पार गरेपछि फिल्ममा छनोट भएँ। थियटरमा गरेको संघर्ष अहिले फल दिन थालेको अनुभूति भइरहेको छ,” उनले बताए।

‘लालीबजार’को सफलतापछि विशाललाई नयाँ चलचित्रका प्रस्तावहरू आउन थालेका छन्। अहिले विभिन्न निर्माण टिमसँग छलफल भइरहेको बताउँदै उनले नयाँ परियोजना छनोटमा हतार नगर्ने स्पष्ट पारे।

“केही फिल्मका प्रस्ताव आएका छन्। केही निर्देशक र निर्मातासँग कुराकानी पनि भइरहेको छ। तर, कुन प्रोजेक्ट गर्ने भन्ने निर्णय गरिसकेको छैन। अब नयाँ यात्राको तयारीमा जुट्दैछु,” उनले भने।

झण्डै नौ वर्षअघि चितवनबाट अभिनयको सपना बोकेर काठमाडौं आएका विशालले पहिलो चलचित्रबाटै दर्शकको मन जित्न सफल भएका छन्। फिल्मको प्रचारप्रसारका क्रममा मोफसल भ्रमणमा पुगेका बेला धेरै दर्शकले उनलाई ‘छोरा होस् त नारायण जस्तो’ भन्ने प्रतिक्रिया दिएको स्मरण गर्दै उनले त्यो माया र विश्वासलाई आगामी चलचित्रहरूमा अझ सशक्त अभिनयमार्फत कायम राख्ने प्रतिबद्धता व्यक्त गरेका छन्।