आर्मोन आफ्नो प्रेरणाको स्रोत आफ्नै बुवालाई मान्छन् भने स्वरसम्राट नारायण गोपाल र भक्तराज आचार्यलाई आफ्नो आदर्श कलाकारका रूपमा लिन्छन्।

यसपटक द भ्वाइस किड्स मा आर्मोनसँगै उनकी बहिनी आध्या कार्की पनि सहभागी भएकी थिइन्। उनले स्वरसम्राट नारायण गोपालको ‘यति धेरै माया दिई’ गीत प्रस्तुत गरेकी थिइन्। उनी अर्को चरणमा पुग्न नसके पनि सबै कोचहरूको प्रशंसा बटुल्न सफल भइन्। कोचहरूले उनको गायन, सुर र टाइमिङको खुलेर प्रशंसा गरेका थिए।

आर्मोनका बुबा पेशाले शिक्षक हुन् भने आमा नर्स हुन्। दुवैले आफ्ना छोराछोरीमाथि कुनै पेशागत दबाब नदिई उनीहरूको रुचिअनुसार संगीत क्षेत्रमा अघि बढ्न निरन्तर प्रोत्साहन गर्दै आएका छन्।

सन्तानलाई केवल डाक्टर, इन्जिनियर वा आईटीजस्ता पेशामा मात्र सफल भविष्य देख्ने प्रवृत्ति बढिरहेका बेला आर्मोनको परिवारले बालबालिकाको रुचि, प्रतिभा र सपना पहिचान गरी त्यसलाई प्रोत्साहन गर्नुपर्छ भन्ने सकारात्मक सन्देश दिएको छ।