दयाहाङ–मिरुनाको ‘रातो घेरा’को शुभमुहूर्त, असार २५ देखि छायांकन

काठमाडौं । निर्देशक अनिल बुढा मगरको निर्देशनमा निर्माण हुन लागेको चलचित्र ‘रातो घेरा – द रेड सर्कल’ को बिहीबार ललितपुरस्थित बंगलामुखी मन्दिरमा शुभमुहूर्त गरिएको छ। पटकथा पूजा गर्दै चलचित्रको औपचारिक शुभारम्भ गरिएको हो भने फिल्मको छायांकन असार २५ गतेदेखि सुरु हुने निर्माण टिमले जनाएको छ।

विश्राम फिल्म्स प्रा.लि.को ब्यानरमा निर्माण हुन लागेको चलचित्रमा अभिनेता दयाहाङ राई र अभिनेत्री मिरुना मगर मुख्य भूमिकामा देखिनेछन्। उनीहरूसँगै करिब दुई दर्जन कलाकारको अभिनय रहनेछ। फिल्मको अधिकांश छायांकन काठमाडौं उपत्यकाका विभिन्न स्थानमा गरिनेछ।

निर्माण टिमले चलचित्रको प्रदर्शन मिति पनि घोषणा गरेको छ। फिल्म आगामी मंसिर १८ गतेदेखि देशभर प्रदर्शनमा आउनेछ।

निर्देशक अनिल बुढा मगरका अनुसार चलचित्र सामाजिक तथा भावनात्मक कथावस्तुमा आधारित छ। सत्य घटनाबाट प्रेरित कथालाई सिनेम्याटिक ढंगले प्रस्तुत गर्दै प्राविधिक रूपमा पनि उत्कृष्ट बनाउने प्रयास गरिएको उनले बताए।

निर्माता जीवन गुरुङले अनुभवी कलाकार र दक्ष प्राविधिक टोलीको साथले चलचित्रलाई उच्चस्तरको बनाउन विशेष ध्यान दिइएको उल्लेख गरे। सत्य घटनामा आधारित कथाले दर्शकलाई फरक अनुभूति दिने उनको विश्वास छ।

चलचित्रमा जीवन गुरुङसँगै कविता गुरुङ, भोजेन्द्र गुरुङ (भोज) र सरुन शेरचन निर्माता रहेका छन् भने सुमन गुरुङ र खेम राना सह–निर्माताको भूमिकामा छन्। फिल्मको संगीत मनोज थापा मगर र सागर आले मगरले तयार गर्नेछन्।

चलचित्रको कथा तथा पटकथा राजु स्याङ्तानले लेखेका हुन्। शिशिर बिसंखे छायाकार रहेका छन् भने निर्माण नियन्त्रण सन्देश राई, कस्ट्युम डिजाइन जानकी कठायत र प्रकाश व्यवस्थापन गुर्केश गुरुङले सम्हाल्नेछन्।

काठमाडौं उपत्यकाको वितरण अधिकार गोविन्द शाहीको काफीया फिल्म्सले तथा काठमाडौं बाहिरको वितरण अधिकार कुवेर सिने डिष्ट्रिब्युसनले लिएको छ।

चलचित्रमा दयाहाङ राई, मिरुना मगर, रजनी गुरुङ, अरुण पुन, सुनिल पोखरेल, भोला सापकोटा, सुरज तमु, खड्गबहादुर पुन, सुस्मिता कुँवर, भावना खपाङ्गी मगर, कविता आले, विजय पौडेल, बलबहादुर गुरुङ, इंगी होपो कोइच सुनुवार, उमेश सुनाम, शेखर चापागाईं, रामबाबु रेग्मी, सुवास गजुरेल, सुवास सिंह ठकुरी, रमिक सिंह ठकुरी, सुनिल तामाङ र डिबी गुरुङलगायत कलाकारको अभिनय रहनेछ।

शुभमुहूर्त कार्यक्रममा अभिनेता दयाहाङ राई र अभिनेत्री मिरुना मगरले सत्य घटनामा आधारित चलचित्रमा काम गर्न पाउँदा उत्साहित रहेको बताउँदै दर्शकले फरक स्वादको सिनेमा हेर्न पाउने विश्वास व्यक्त गरे।

शुक्रबार, असार १९, २०८३ मा प्रकाशित