काठमाडौं । कप्तान लियोनेल मेसीको गोल र अतिरिक्त समयमा प्राप्त आत्मघाती गोलको मद्दतमा अर्जेन्टिनाले फिफा विश्वकप २०२६ को राउन्ड अफ ३२ मा काबो भर्डेलाई ३–२ ले पराजित गर्दै अन्तिम १६ मा स्थान सुरक्षित गरेको छ।
मियामी स्टेडियममा भएको रोमाञ्चक प्रतिस्पर्धा निर्धारित ९० मिनेटमा १–१ को बराबरीमा सकिएपछि खेल अतिरिक्त समयमा पुगेको थियो। अन्ततः अतिरिक्त समयमै अर्जेन्टिनाले निर्णायक गोल गर्दै जित आफ्नो पक्षमा पार्यो।
अर्जेन्टिनाले खेलको २९औँ मिनेटमा अग्रता लिएको थियो। कप्तान लियोनेल मेसीले सुन्दर फिनिसिङ गर्दै टोलीलाई १–० को अग्रता दिलाए। पहिलो हाफ सोही नतिजामा सकिएको थियो।
दोस्रो हाफमा काबो भर्डेले उत्कृष्ट पुनरागमन गर्यो। खेलको ५९औँ मिनेटमा डेरोय दुआर्टेले गोल गर्दै खेल १–१ को बराबरीमा ल्याए। त्यसपछि निर्धारित समयसम्म दुवै टोलीबाट थप गोल हुन नसकेपछि खेल अतिरिक्त समयमा धकेलियो।
अतिरिक्त समयको दोस्रो मिनेट (९२औँ मिनेट) मा डिफेन्डर लिसान्द्रो मार्टिनेजले गोल गर्दै अर्जेन्टिनालाई पुनः २–१ को अग्रता दिलाए। तर काबो भर्डेले हार नमानी १०३औँ मिनेटमा सिड्नी लोपेज काब्रालको गोलमार्फत फेरि खेल २–२ को बराबरीमा ल्यायो।
खेल पेनाल्टी सुटआउटतर्फ अग्रसर भइरहेका बेला १११औँ मिनेटमा काबो भर्डेका डिने बोर्गेसबाट आत्मघाती गोल हुन पुग्यो। त्यही गोल अर्जेन्टिनाको जितको निर्णायक आधार बन्यो।
बलियो प्रतिद्वन्द्वी अर्जेन्टिनाविरुद्ध कडा चुनौती प्रस्तुत गरेको काबो भर्डे अन्ततः दुर्भाग्यपूर्ण हारसँगै विश्वकपबाट बाहिरिएको छ।
यस जितसँगै अर्जेन्टिनाले जुलाई ७ मा एटलान्टामा हुने अन्तिम १६ को खेलमा अस्ट्रेलियालाई पेनाल्टी सुटआउटमा पराजित गर्दै अघि बढेको इजिप्टसँग प्रतिस्पर्धा गर्नेछ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.