काठमाडौं । अजेडिन औनाहीको शानदार दुई गोल र सौफियाने राहीमीको इन्जुरी समयको गोलमा मोरक्कोले सह–आयोजक क्यानडालाई ३–० ले पराजित गर्दै फिफा विश्वकप २०२६ को क्वाटरफाइनलमा स्थान सुरक्षित गरेको छ।
ह्युस्टनमा भएको अन्तिम १६ को प्रतिस्पर्धामा मोरक्कोले दोस्रो हाफमा उत्कृष्ट प्रदर्शन गर्दै लगातार दोस्रो विश्वकपमा अन्तिम आठको यात्रा तय गरेको हो। सन् २०२२ को कतार विश्वकपमा सेमिफाइनलसम्म पुगेको मोरक्कोले यसपटक पनि उपाधि यात्रालाई निरन्तरता दिएको छ। अब उसले जुलाई ९ मा बोस्टनमा हुने क्वाटरफाइनलमा फ्रान्ससँग प्रतिस्पर्धा गर्नेछ।
घरेलु समर्थकको साथ पाएको क्यानडाले खेलको सुरुआत आक्रामक शैलीमा गरेको थियो। अली अहमदको पासमा तानी ओलुवासेयीले सुरुमै उत्कृष्ट अवसर सिर्जना गरे पनि मोरक्कोका गोलकिपर यासिन बोनोले शानदार बचाउ गर्दै टोलीलाई सुरुआती झट्काबाट जोगाए।
खेलको २२औँ मिनेटमा मोरक्कोका प्रमुख आक्रमणकर्ता इस्माएल साइबारी चोटका कारण मैदानबाट बाहिरिएपछि टोली केही दबाबमा परेको थियो। उनको स्थानमा सौफियाने राहीमी मैदान प्रवेश गरेका थिए।
पहिलो हाफ गोलरहित बराबरीमा सकिएपछि दोस्रो हाफमा मोरक्कोले आफ्नो वास्तविक लय समात्यो। खेलको ५०औँ मिनेटमा अस्रफ हाकिमीको चलाखीपूर्ण फ्रिकिक पासलाई अजेडिन औनाहीले डिबक्स बाहिरबाट पहिलो टचमै शानदार प्रहार गर्दै गोलमा परिणत गरे र मोरक्कोलाई अग्रता दिलाए।
त्यसपछि बराबरी गोलको खोजीमा रहेको क्यानडाले केही अवसर बनाए पनि यासिन बोनोको उत्कृष्ट प्रदर्शनका कारण सफल हुन सकेन। खेलको ८२औँ मिनेटमा ब्राहिम डियाजको पासमा औनाहीले व्यक्तिगत दोस्रो गोल गर्दै मोरक्कोको जित लगभग निश्चित गरे।
इन्जुरी समयको आठौँ मिनेट (९०+८) मा ब्राहिम डियाजकै थ्रु–बलमा सौफियाने राहीमीले सहज गोल थपेपछि मोरक्कोले ३–० को प्रभावशाली जित दर्ता गर्यो।
योसँगै औनाही विश्वकप इतिहासमा सन् २००२ मा सेनेगलका हेन्री कमारापछि नकआउट चरणमा दुई गोल गर्ने पहिलो अफ्रिकी खेलाडी बनेका छन्। साथै, औनाहीले गोल गरेका सबै आठ खेलमा मोरक्कोले जित निकाल्ने आफ्नो शतप्रतिशत कीर्तिमान पनि कायम राखेको छ।
यता, पहिलो पटक विश्वकपको नकआउट चरण पुगेको क्यानडाको ऐतिहासिक यात्रा अन्तिम १६ मै टुंगिएको छ। हारका बाबजुद प्रतियोगितामा गरेको प्रदर्शन भने क्यानडाका लागि उत्साहजनक मानिएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.