काठमाडौं । कप्तान केलियन एमबाप्पेको दोस्रो हाफको निर्णायक पेनाल्टी गोलमा फ्रान्सले पाराग्वेलाई १–० ले पराजित गर्दै फिफा विश्वकप २०२६ को क्वाटरफाइनलमा स्थान सुरक्षित गरेको छ।
फिलाडेल्फिया रंगशालामा सम्पन्न अन्तिम १६ को निकै प्रतिस्पर्धात्मक खेलमा फ्रान्सले बलमाथि अधिकांश समय नियन्त्रण कायम राखे पनि जित निकाल्न अन्तिमतिरसम्म संघर्ष गर्नुपरेको थियो। खेलको एकमात्र गोल एमबाप्पेले ६९औँ मिनेटमा पेनाल्टीमार्फत गरेका हुन्।
यस जितसँगै फ्रान्सले जुलाई ९ मा बोस्टनमा हुने क्वाटरफाइनलमा मोरक्कोसँग प्रतिस्पर्धा गर्नेछ। मोरक्कोले अन्तिम १६ मा सह–आयोजक क्यानडालाई ३–० ले पराजित गर्दै अन्तिम आठमा स्थान बनाएको थियो।
जर्मनीलाई पेनाल्टी सुटआउटमा स्तब्ध पार्दै अन्तिम १६ पुगेको पाराग्वेले फ्रान्सविरुद्ध पनि सशक्त रक्षात्मक रणनीति अपनाएको थियो। पहिलो हाफभर फ्रान्सले बलमा पकड बनाए पनि स्पष्ट गोलका अवसर सिर्जना गर्न सकेन। पाराग्वेका गोलकिपर ओर्लान्डो गिलले फ्रान्सका सीमित प्रहार सहजै नियन्त्रणमा लिए।
दोस्रो हाफमा भने फ्रान्सले लगातार आक्रमणको दबाब बढायो। उसमान डेम्बेलेको प्रहार साइड नेटमा लाग्यो भने मनु कोनेको शक्तिशाली सटलाई गोलकिपर गिलले उत्कृष्ट बचाउ गर्दै टोलीलाई खेलमा टिकाइराखे।
तर ६९औँ मिनेटमा खेलले निर्णायक मोड लियो। पेनाल्टी क्षेत्रभित्र डेसिरे डौएमाथि फउल भएपछि भिडियो सहायक रेफ्री (VAR) को समीक्षा पश्चात् फ्रान्सले पेनाल्टी पायो। कप्तान एमबाप्पेले कुनै गल्ती नगरी बललाई जाली चुमाउँदै फ्रान्सलाई १–० को अग्रता दिलाए।
बाँकी समयमा पाराग्वेले बराबरी गोलका लागि प्रयास गरे पनि फ्रान्सको अनुशासित रक्षापंक्तिले सबै आक्रमण विफल पार्दै जित सुरक्षित गर्यो।
यस गोलसँगै एमबाप्पेले जारी विश्वकपमा आफ्नो गोल संख्या सात पुर्याएका छन्। गोल्डेन बुटको दौडमा उनी लियोनेल मेस्सीसँग गोल संख्यामा बराबरीमा रहे पनि असिस्टका आधारमा शीर्ष स्थानमा छन्।
विश्वकप इतिहासमा एमबाप्पेको कुल गोल संख्या पनि १९ पुगेको छ। अब उनी विश्वकपमा सर्वाधिक २० गोल गरेका लियोनेल मेस्सीको कीर्तिमान बराबरी गर्न केवल एक गोल टाढा रहेका छन्।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.