भदौ २६ मा आउँदै ‘माया भनेकै यस्तो होला’, सार्वजनिक भयो नयाँ पोस्टर

काठमाडौं । आगामी भदौ २६ गतेदेखि प्रदर्शनमा आउन लागेको चलचित्र ‘माया भनेकै यस्तो होला’को नयाँ पोस्टर सार्वजनिक गरिएको छ। निर्माण टिमले मुख्य कलाकारहरूलाई समेटिएको पोस्टर सार्वजनिक गर्दै चलचित्रको प्रचारलाई तीव्र बनाएको हो।

सार्वजनिक पोस्टरमा चलचित्रका मुख्य पात्र दील श्रेष्ठ विवाहअघिको हल्दी समारोहमा देखिएका छन्। उनीसँगै मदनकृष्ण श्रेष्ठ, लक्ष्मी गिरी, सृष्टि श्रेष्ठ, नीति शाह र नम्रता श्रेष्ठ पनि पोस्टरमा अटाएका छन्। हल्दी समारोहको उल्लासपूर्ण वातावरण, आकर्षक सजावट र पात्रहरूको पहिरनले सम्पन्न परिवारमा विवाहको तयारी भइरहेको संकेत गर्छ।

पोस्टरमा नम्रता श्रेष्ठ हुनेवाला दुलाहाका लागि पुष्पगुच्छ बोकेर उभिएकी छन् भने मदनकृष्ण श्रेष्ठ ह्विलचेयरमा देखिएकाले उनको पात्र शारीरिक रूपमा अशक्त रहेको अनुमान गर्न सकिन्छ। समग्रमा पोस्टरले चलचित्र पारिवारिक सम्बन्ध, प्रेम र भावनामा केन्द्रित पारिवारिक ड्रामा रहेको झल्को दिन्छ।

अभिनेत्री रेखा थापाको निर्देशनमा बनेको यो चलचित्रबाट उनी करिब आठ वर्षपछि निर्देशनमा फर्किएकी हुन्। यसअघि उनले ‘हिम्मतवाली’ र ‘मालिका’ निर्देशन गरिसकेकी छन्। ‘माया भनेकै यस्तो होला’ उनको तेस्रो निर्देशकीय फिचर फिल्म हो। यसपटक उनले आफ्नै ब्यानर रेखा फिल्मस्भन्दा बाहिर रहेर दिया एण्ड अमु फिल्मस्को ब्यानरमा चलचित्र निर्देशन गरेकी हुन्।

चलचित्रमा मदनकृष्ण श्रेष्ठ, दील श्रेष्ठ, सृष्टि श्रेष्ठ, नम्रता श्रेष्ठ तथा पूर्व मिस नेपाल इन्टरनेसनल नीति शाह मुख्य भूमिकामा छन्। विशेष भूमिकामा पूर्व मिस नेपाल उषा खड्गीको अभिनय रहेको छ। साथै लक्ष्मी गिरी, विशाल पहाडी, संगम भण्डारी, रवि डंगोल, सुनिता श्रेष्ठ र विनोद पौडेललगायत कलाकारको पनि अभिनय रहेको छ।

दिया एण्ड अमु फिल्मस्को ब्यानरमा निर्माण भएको चलचित्रका निर्माता हरि नारायण श्रेष्ठ, माया देवी श्रेष्ठ, नवराज श्रेष्ठ, जस्मिन श्रेष्ठ र प्रकाश श्रेष्ठ हुन्। चलचित्रले सुमधुर प्रेमकथामार्फत पारिवारिक सम्बन्ध, सामाजिक भावना र समकालीन परिवेशलाई प्रस्तुत गर्ने निर्माण पक्षको दाबी छ।

चलचित्रको पटकथा ध्रुव लम्सालले लेखेका हुन्। सुदीप बरालको छायांकन, प्रशान्त सिवाकोटीको संगीत, अनिरुद्ध आत्रेयको प्रमुख सहायक निर्देशन, राजन घिमिरेको फिल्म संयोजन, सुजेनी मल्लको ड्रेस डिजाइन, प्रिया कार्कीको मेकअप तथा चुडामणि (सीएम)को प्रोडक्सन व्यवस्थापन रहेको छ।

हाल पोस्ट–प्रोडक्सनको अन्तिम चरणमा रहेको चलचित्रलाई रीच इन्टरटेन्मेन्ट, एप्पल इन्टरटेन्मेन्ट र एफडी कम्पनीले देशभर वितरण गर्नेछन्।

शनिबार, असार २७, २०८३ मा प्रकाशित