दुई दशकअघि डा. भोला रिजालले निर्माण गरेको ‘गौँथली’ नेपाली चलचित्र इतिहासकै पहिलो गीति (म्युजिकल) चलचित्रका रूपमा परिचित छ। प्रदर्शनका क्रममा उक्त चलचित्रले ५१ दिन सफल प्रदर्शन गरेको थियो। अहिले सोही नाममा डा. भोला रिजालका छोरा डा. कपिल रिजालले नयाँ कथासहित ‘गौँथली’ निर्देशन गरेका हुन्।

भोला रिजाल प्रोडक्सन र सुमन गिरी प्रोडक्सनको प्रस्तुतिमा बनेको चलचित्रमा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सञ्जोग रसाइली, सीतादेवी तिमिल्सिना, लक्ष्मीनाथ तिमिल्सिना र राजेन्द्र नेपालीको अभिनय रहेको छ। बाल कलाकारका रूपमा अंशु ओली र प्रिन्स नेपालीले अभिनय गरेका छन्।

चलचित्रकी कार्यकारी निर्माता सरला रिजाल हुन् भने सुमन गिरी र डा. कपिल रिजाल निर्माता रहेका छन्। इन्दु गिरी, मनिष रिजाल, प्रलय रिजाल र जीवन ओली सह–निर्माता हुन्।

डा. भोला रिजालको कथामा आधारित चलचित्रको पटकथा तथा संवाद डा. कपिल रिजाल, निश्चल कुँवर, निरज नेपाल र गिरिराज घिमिरेले संयुक्त रूपमा तयार पारेका हुन्। चलचित्रमा गिरिराज घिमिरे मुख्य सहायक निर्देशक, हरि हुमागाईं छायांकार तथा मिलन श्रेष्ठ सम्पादक रहेका छन्।