ब्रेन ट्युमरको सफल शल्यक्रियापछि दीपाश्री निरौला स्वास्थ्यलाभ गर्दै

नमस्ते चितवन

आइतबार, असार २८, २०८३ मा प्रकाशित

काठमाडौं । अभिनेत्री तथा निर्देशक दीपाश्री निरौलाको ब्रेन ट्युमरको सफल शल्यक्रिया गरिएको छ। काठमाडौंको माइतीघरस्थित अन्नपूर्ण न्युरो अस्पतालमा उनको शल्यक्रिया सम्पन्न भएको हो।

केही दिनअघि स्वास्थ्यमा समस्या देखिएपछि अस्पताल भर्ना भएकी निरौला हाल उपचाररत छिन्। सफल शल्यक्रियापछि उनलाई आइसियूबाट जनरल वार्डमा सारिएको छ र स्वास्थ्यमा क्रमिक सुधार भइरहेको जनाइएको छ।

अभिनेता तथा निर्माता दीपकराज गिरीले सामाजिक सञ्जालमार्फत निरौलाको स्वास्थ्य अवस्थाबारे जानकारी दिएका हुन्। उनका अनुसार चलचित्रको छायांकनकै क्रममा निरौलालाई ब्रेन ट्युमर भएको पत्ता लागेको थियो। त्यसपछि निर्माण टोली केही समय अन्योलमा परेको र चिकित्सकको सल्लाहअनुसार तत्काल शल्यक्रिया गर्नुपर्ने अवस्था आएको उनले बताएका छन्।

प्रारम्भिक रूपमा उपचारका लागि भारत लैजाने सुझाव आए पनि अन्ततः नेपालमै वरिष्ठ न्युरोसर्जन डा. बसन्त पन्तको नेतृत्वमा शल्यक्रिया गर्ने निर्णय गरिएको गिरीले उल्लेख गरेका छन्।

सामाजिक सञ्जालमा उनले लेखेका छन्, “यो साता हाम्रो लागि निकै चुनौतीपूर्ण र कठिन रह्यो। सुटिङकै क्रममा दीपाजीलाई ब्रेन ट्युमर भएको पत्ता लाग्यो। त्यसपछि तुरुन्त शल्यक्रिया गर्नुपर्ने अवस्था आयो। भारत जाने सल्लाह पनि आयो, तर अन्ततः नेपालमै डा. बसन्त पन्तको नेतृत्वमा शल्यक्रिया गर्ने निर्णय गरियो। भगवानको कृपाले शल्यक्रिया सफलतापूर्वक सम्पन्न भयो। अहिले उहाँ आइसियूबाट जनरल वार्डमा सरेर स्वास्थ्यलाभ गरिरहनुभएको छ।”

गिरीले दीपाश्रीको शीघ्र स्वास्थ्यलाभको कामना गर्ने दर्शक, शुभेच्छुक तथा उपचारमा संलग्न चिकित्सक र स्वास्थ्यकर्मीप्रति आभारसमेत व्यक्त गरेका छन्।