टिकटकमा ‘नौतुना रेलैमा’को लहर, ‘पार्वती’को चर्चा चुलियो

काठमाडौं । अभिनेत्री तथा निर्देशक नीता ढुङ्गाना निर्देशित बहुप्रतीक्षित नेपाली चलचित्र ‘पार्वती’को चर्चित गीत ‘नौतुना रेलैमा’ सामाजिक सञ्जालमा व्यापक रूपमा भाइरल बनेको छ।

केही समयअघि ओएसआर डिजिटलमार्फत सार्वजनिक गरिएको उक्त गीतमा हालसम्म ३० हजार २०० भन्दा बढी टिकटक भिडियो निर्माण भइसकेका छन्। टिकटकसँगै फेसबुक, युट्युब र अन्य सामाजिक सञ्जालमा पनि गीतले उल्लेखनीय लोकप्रियता हासिल गरिरहेको छ।

गीतको लोकप्रियतालाई थप उत्साहजनक बनाउन निर्माण टिमले ‘नौतुना रेलैमा टिकटक प्रतियोगिता’ समेत घोषणा गरेको थियो। प्रतियोगिताअन्तर्गत सहभागीले उक्त गीतमा सिर्जनात्मक भिडियो तयार गरी टिकटकमा पोस्ट गर्नुपर्ने व्यवस्था गरिएको छ।

निर्माण पक्षका अनुसार उत्कृष्ट तीन भिडियोलाई नगद पुरस्कार प्रदान गरिनेछ। प्रथम हुनेले ५० हजार रुपैयाँ, दोस्रो हुनेले ३० हजार रुपैयाँ र तेस्रो हुनेले २० हजार रुपैयाँ प्राप्त गर्नेछन्। साथै पाँच जना सहभागीलाई चलचित्र **‘पार्वती’**को निःशुल्क टिकट उपलब्ध गराइने जनाएको छ।

प्रतियोगितामा सहभागी हुन भिडियो पोस्ट गर्दा #पार्वती, #भाद्र१२ र #नौतुना_रेलैमा ह्यासट्याग अनिवार्य रूपमा प्रयोग गर्नुपर्ने निर्माण पक्षले जनाएको छ। उत्कृष्ट भिडियोको सिर्जनात्मकता र प्राप्त भ्युजका आधारमा विजेता छनोट गरिनेछ।

सार्वजनिक गीतको भिडियोमा चलचित्रका मुख्य कलाकार नीता ढुङ्गाना, दीपाश्री निरौला, अञ्जली अधिकारी, सिरु विष्ट, बसुन्धरा भुसाल, आशा पौडेल, अशोक दर्जी र क्रिमसन श्रेष्ठको नृत्य देख्न सकिन्छ। विवाहको अवसरमा खेलिने नेपाली रत्यौली संस्कृतिलाई मनोरञ्जनात्मक शैलीमा प्रस्तुत गरिएको गीतमा दीपाश्री निरौला पुरुषको भेषमा देखिएकी छन् भने नीता ढुङ्गाना परम्परागत महिला पहिरनमा प्रस्तुत भएकी छन्।

नीता ढुङ्गानाको कथा तथा निर्देशनमा बनेको चलचित्र ‘पार्वती’मा उनी स्वयं मुख्य भूमिकामा छिन्। फिल्ममा दीपाश्री निरौला, अशोक दर्जी, सिरु विष्ट, राधिका कँडेल, राज पंगेनी शर्मा, राजेन्द्र नेपाली र आशा पौडेललगायत कलाकारको अभिनय रहेको छ।

चलचित्रको पटकथा शिवम् अधिकारीले लेखेका हुन्। सुदीप बरालको छायांकन, रामजी लामिछानेको नृत्य निर्देशन रहेको फिल्मका कार्यकारी निर्माता शंकर पाण्डे तथा निर्माता हरिहर अधिकारी हुन्।

नीता फिल्म्सको प्रस्तुति रहेको चलचित्र ‘पार्वती’ आगामी भदौ १२ गतेदेखि देशभर प्रदर्शनमा आउने तयारीमा छ। गीतको बढ्दो लोकप्रियतासँगै चलचित्रप्रति दर्शकको उत्सुकता पनि बढ्दै गएको निर्माण टिमको विश्वास छ।

बुधबार, असार ३१, २०८३ मा प्रकाशित