ओएसआर डिजिटलले महँगो मूल्यमा किन्यो ‘म मदनकृष्ण’को डिजिटल राइट्स

काठमाडौं । वरिष्ठ कलाकार मदनकृष्ण श्रेष्ठको जीवनमा आधारित बन्न लागेको बायोपिक चलचित्र ‘म मदनकृष्ण’को डिजिटल अधिकार कीर्तिमानी मूल्यमा बिक्री भएको छ। नेपालको अग्रणी डिजिटल प्लेटफर्म ओएसआर डिजिटलले चलचित्रको डिजिटल प्रदर्शन अधिकार उच्च मूल्यमा खरिद गरेको निर्माण पक्षले जनाएको छ।

भदौ दोस्रो सातादेखि छायांकन सुरु हुने तयारीमा रहेको चलचित्रलाई बायोपिक विधामा सफल निर्देशकका रूपमा परिचित मिलन चाम्सले निर्देशन गर्दैछन्। ७६ वर्षीय मदनकृष्ण श्रेष्ठको जीवन, संघर्ष, कला यात्रा र व्यक्तिगत पक्षलाई समेटेर चलचित्र निर्माण गर्न लागिएको हो।

निर्माण टिमका अनुसार चलचित्रमा मदनकृष्णको बाल्यकालदेखि सरकारी सेवामा बिताएको समय, हरिवंश आचार्यसँगको अविस्मरणीय सहकार्य, अन्तरजातीय विवाह तथा जीवनका उतारचढावलाई विस्तृत रूपमा प्रस्तुत गरिनेछ।

निर्देशक मिलन चाम्सले ओएसआर डिजिटलसँग भएको सम्झौता नेपाली चलचित्र उद्योगकै उल्लेखनीयमध्ये एक भएको बताए।

उनले भने, “ओएसआर डिजिटलले अहिलेसम्मकै उच्च मूल्यमा ‘म मदनकृष्ण’को डिजिटल अधिकार खरिद गरेको छ। यो केवल चलचित्रप्रतिको विश्वास मात्र होइन, मदनकृष्ण दाइको व्यक्तित्व र योगदानप्रतिको सम्मान पनि हो।”

नेपाली चलचित्र इतिहासमा कुनै चर्चित अभिनेताको जीवनमा आधारित बायोपिक निर्माण हुन लागेको यो पहिलो अवसर भएको निर्माण पक्षको दाबी छ। यसअघि गायक भक्तराज आचार्यको जीवनमा आधारित चलचित्र ‘आचार्य’ निर्माण भएको थियो भने अन्य क्षेत्रका केही व्यक्तित्वमाथि पनि बायोपिक बनेका छन्।

चलचित्रमा महेश त्रिपाठीले मदनकृष्ण श्रेष्ठको भूमिका निर्वाह गर्नेछन् भने केकी अधिकारीले उनकी पत्नी यशोदा श्रेष्ठको भूमिका निभाउनेछिन्।

मदनकृष्णसँग लामो समयदेखि सहकार्य गर्दै आएका हरिवंश आचार्यको भूमिकामा कसले अभिनय गर्ने भन्ने विषय भने निर्माण टिमले हालसम्म गोप्य राखेको छ।

चलचित्रमा राजाराम पौडेल, किरण केसी, रुषा न्यौपाने, यमन श्रेष्ठ र देशभक्त खनालको पनि अभिनय रहनेछ।

भिन्टेज मोसन पिक्चर्सको प्रस्तुतिमा निर्माण हुने चलचित्रका निर्माता राजकुमार श्रेष्ठ हुन्। चलचित्रको कथा तथा पटकथा यम थापाले लेखेका छन्। पदमबहादुर श्रेष्ठ (बाबु श्रेष्ठ) छायांकन निर्देशक, मिलन श्रेष्ठ सम्पादक, अलिश कार्की ब्याकग्राउन्ड म्युजिक कम्पोजर तथा भरत कँडेल साउन्ड डिजाइनर रहेका छन्।

भदौ दोस्रो साताबाट छायांकन सुरु हुने चलचित्रलाई रिच इन्टरटेनमेन्ट, एप्पल इन्टरटेनमेन्ट र एफ.डी. कम्पनीले देशव्यापी रूपमा वितरण गर्नेछन्।

बिहिबार, असार ३२, २०८३ मा प्रकाशित