काठमाडौं, साउन १ । ललितपुरको ग्वार्कोस्थित गुण सिनेमा तीन वर्षपछि नयाँ स्वरूपमा पुनः सञ्चालनमा आएको छ। अत्याधुनिक प्रविधिसहित ८ वटा स्क्रिनसहितको मल्टिप्लेक्स बिहीबारदेखि औपचारिक रूपमा सञ्चालनमा आएको हो।
वि.सं. २०५२ सालमा स्थापना भएको गुण सिनेमाले करिब २७ वर्षसम्म निरन्तर सेवा दिएको थियो। नयाँ भवन निर्माणका लागि २०७९ सालमा बन्द गरिएको सिनेमा अब थप सुविधा र आधुनिक प्रविधिसहित पुनः सञ्चालनमा आएको हो।
सञ्चालन उद्घाटनका अवसरमा गुण सिनेमा प्रालिका अध्यक्ष राजेन्द्र (दिजेन्द्र) शाक्यले नयाँ भवनसँगै दर्शकलाई अझ स्तरीय चलचित्र अनुभव दिने उद्देश्य राखिएको बताए।
उनले भने, “नयाँ भवन निर्माणका कारण केही वर्ष दर्शकलाई असुविधा भयो। अब हामी थप एक स्क्रिनसहित फर्किएका छौँ। दर्शकले आफ्नो रुचिअनुसारका नेपाली तथा विदेशी चलचित्र उत्कृष्ट वातावरणमा हेर्न सक्नेछन्।”
देशकै ठूलो मल्टिप्लेक्स चेन क्यूएफएक्सको व्यवस्थापनमा सञ्चालन हुने गुण सिनेमामा ४१ देखि २६० सिट क्षमताका ८ वटा हल रहेका छन्।
हलमा बार्को २के लेजर प्रोजेक्टर, जीडीसी सर्भर, जेबीएल स्पिकर, डीटीएस–एक्स इमर्सिभ साउन्ड सिस्टम तथा गालालाइट सिल्भर स्क्रिन जडान गरिएको छ। साथै, प्रिमियम सोफा सिट, पूर्ण वातानुकूलित हल, आकर्षक लबी र हिमालयन जाभासहितका फुड तथा स्न्याक्स सेवाको पनि व्यवस्था गरिएको छ।
कार्यक्रममा चलचित्र विकास बोर्डका अध्यक्ष दिनेश डिसीले आधुनिक सुविधा सम्पन्न नयाँ गुण सिनेमाले नेपाली चलचित्र उद्योगलाई थप ऊर्जा दिने विश्वास व्यक्त गरे। नेपाल चलचित्र संघका अध्यक्ष नरेन्द्र महर्जनले पनि नयाँ मल्टिप्लेक्सले चलचित्र बजार विस्तारमा महत्वपूर्ण भूमिका खेल्ने बताए।
त्यस्तै, क्यूएफएक्सका प्रमुख नकिम उद्दिनले दरबार सिनेम्याक्सपछि गुण सिनेमासँग सहकार्य गर्न पाएकोमा खुसी व्यक्त गर्दै गुण सिनेमा सधैँ गुणस्तरीय सेवा र प्रविधिको पक्षमा रहेको बताए।
गुण सिनेमामा यसअघि एउटै परिसरमा ७ वटा हल सञ्चालनमा थिए। काठमाडौं उपत्यकासहित काभ्रे, सिन्धुपाल्चोक, रामेछाप र सिन्धुलीबाट समेत ठूलो संख्यामा दर्शक यहाँ चलचित्र हेर्न आउने गरेका थिए। निर्माता छविराज ओझाले नयाँ स्वरूपमा गुण सिनेमाको पुनः सञ्चालनसँगै नेपाली चलचित्रको स्वर्णिम व्यापारिक वातावरण फेरि फर्किने विश्वास व्यक्त गरे।
हाल पुनः सञ्चालनमा आएको गुण सिनेमामा नेपाली चलचित्र ‘गौँथली’, हिन्दी चलचित्र ‘धमाल ४’ र हलिउड चलचित्र ‘द ओडिसी’ प्रदर्शन भइरहेका छन्।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.