काठमाडौं । प्रदर्शनअघि नै दर्शकमाझ राम्रो चर्चा कमाएको नेपाली चलचित्र ‘गौँथली’ ले प्रदर्शनको पहिलो दिनदेखि नै उत्साहजनक प्रतिक्रिया बटुलिरहेको छ। शुक्रबारदेखि देशभर प्रदर्शनमा आएको चलचित्रले सकारात्मक ‘वर्ड अफ माउथ’ पाउँदै शनिबार थप मजबुत व्यापारिक संकेत देखाएको हो।
पहिलो दिनको उत्कृष्ट प्रतिक्रियापछि शनिबार अधिकांश हलमा चलचित्रका शोमा उच्च दर्शक उपस्थिति देखिएको छ। अग्रिम टिकट बुकिङ उत्साहजनक भएपछि मल्टिप्लेक्स तथा अन्य हलहरूले ‘गौँथली’का शो समेत बढाएका छन्।
शुक्रबारको तुलनामा शनिबार चलचित्रले उल्लेख्य रूपमा बढी शो पाएको छ। दर्शकको बढ्दो आकर्षणलाई मध्यनजर गर्दै हल सञ्चालकहरूले अतिरिक्त शो थपेका हुन्।
दर्शकको उत्साह देखेर निर्देशक डा. कपिल रिजालसहित कलाकार अरुण क्षेत्री, सिम्रन खड्कालगायतको टोली विभिन्न सिनेमा हलमा पुगेर प्रत्यक्ष रूपमा दर्शकसँग भेटघाट गर्दै प्रतिक्रिया संकलन गरिरहेको छ। चलचित्रले नेपाली गाउँघरको यथार्थ जीवनलाई जीवन्त रूपमा प्रस्तुत गरेको भन्दै धेरै दर्शकले निर्माण टिमको खुलेर प्रशंसा गरेका छन्।
निर्देशक डा. कपिल रिजालले दर्शकबाट प्राप्त प्रतिक्रियाले सम्पूर्ण टिम उत्साहित बनेको बताए। उनले भने, “हामीले भेटेका अधिकांश दर्शकले ‘गौँथली’लाई हेर्नैपर्ने मौलिक नेपाली चलचित्र भन्नुभएको छ। उहाँहरूको माया र सकारात्मक प्रतिक्रियाले अझ जिम्मेवार भएर काम गर्ने ऊर्जा दिएको छ।”
चलचित्रमा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सञ्जोग रसाइली, सीतादेवी तिमिल्सिना, लक्ष्मीनाथ तिमिल्सिनालगायत कलाकारहरूको अभिनय रहेको छ।
डा. भोला रिजालको कथामा आधारित यस चलचित्रको पटकथा तथा संवाद डा. कपिल रिजाल, निश्चल कुँवर, नीरज नेपाल र गिरिराज घिमिरेले संयुक्त रूपमा तयार गरेका हुन्। घर, परिवार, सम्बन्ध र आत्मीयताको भावलाई केन्द्रमा राखेर निर्माण गरिएको ‘गौँथली’को वितरण रिच इन्टरटेनमेन्ट, एप्पल इन्टरटेनमेन्ट र एफडी कम्पनीले गरेका छन्।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.