काठमाडौं : नेपाली चलचित्र उद्योगमा अर्को महत्वाकांक्षी परियोजनाको रूपमा ‘बम्पर चिठ्ठा’ निर्माण हुने भएको छ। स्याडो पिक्चर्सको ब्यानरमा बन्ने यस चलचित्रको थिम पोस्टर सार्वजनिक गर्दै निर्माण टिमले औपचारिक घोषणा गरेको हो।
चलचित्रको निर्देशन बिक्की महर्जनले गर्नेछन् भने अमित अग्रहरि र निशा गुइदे निर्माता रहेका छन्। निर्देशक महर्जन स्वयंले कथा लेखेको चलचित्र नेपाली मौलिकता, संस्कृति र समकालीन मनोरञ्जनलाई अन्तर्राष्ट्रिय दर्शकमाझ पुर्याउने उद्देश्यका साथ निर्माण गर्न लागिएको हो।
सार्वजनिक गरिएको थिम पोस्टरले नेपालको सांस्कृतिक सम्पदा र रहस्यमय परिवेशलाई कलात्मक ढंगले प्रस्तुत गरेको छ। प्राचीन मन्दिरको शिखरबाट तलको चहलपहल नियालिरहेको दृश्यले कथाप्रति जिज्ञासा बढाउने प्रयास गरेको छ। पोस्टरले कथावस्तु खुलाएको छैन, तर नेपाली समाज, संस्कृति र मानवीय सम्बन्धलाई रोचक शैलीमा प्रस्तुत गरिने संकेत दिएको छ।
निर्माण टिमका अनुसार ‘बम्पर चिठ्ठा’ नेपाली, हिन्दी, तेलुगु र फ्रेन्च गरी चार भाषामा निर्माण हुनेछ। चलचित्रलाई विश्वव्यापी रूपमा अमेजन प्राइम भिडियोमार्फत प्रदर्शन गर्ने तयारी गरिएको छ, जसबाट २४० भन्दा बढी देशका दर्शकमाझ पुग्ने लक्ष्य राखिएको छ।
नेपाली चलचित्रलाई अन्तर्राष्ट्रिय बजारमा थप मजबुत रूपमा स्थापित गर्ने लक्ष्यसहित निर्माण हुन लागेको यस चलचित्रका कलाकार तथा अन्य प्राविधिक टोलीको विवरण भने आगामी दिनमा सार्वजनिक गरिनेछ।
यसअघि यही टिमले निर्माण गरेको चलचित्र ‘आउट ल’ पनि आगामी सेप्टेम्बरमा अमेजन प्राइम भिडियोमार्फत विश्वव्यापी प्रदर्शनमा आउने तयारीमा छ। निर्माण पक्षका अनुसार ‘आउट ल’को प्रदर्शनपछि ‘बम्पर चिठ्ठा’को निर्माण कार्य तीव्र रूपमा अघि बढाइनेछ।
निर्माण टिमले ‘बम्पर चिठ्ठा’लाई केवल मनोरञ्जनात्मक चलचित्रका रूपमा नभई नेपाली सिनेमालाई विश्व बजारमा थप सशक्त रूपमा चिनाउने महत्वाकांक्षी परियोजनाका रूपमा अघि बढाएको जनाएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.