निर्देशक रिजालका अनुसार ‘गौँथली’ले श्रीमान्–श्रीमतीबीचको विश्वास, अन्यायविरुद्ध आवाज उठाउने साहस, संघर्ष, धैर्यता र छोरीको शिक्षाको महत्वलाई सशक्त रूपमा प्रस्तुत गरेको छ। विशेषगरी महिलाको पीडा र आत्मसम्मानसँग जोडिएको कथाले धेरै दर्शकको मन छोएको प्रतिक्रिया आएको उनले बताए।

निर्माता सुमन गिरीका अनुसार मंगलबार पनि देशभरका अधिकांश हलमा चलचित्रको अकुपेन्सी उत्साहजनक रहेको छ। बिहानका शोमा ७०–८० प्रतिशतसम्म र दिउँसो तथा साँझका धेरै शोहरूमा शतप्रतिशत अकुपेन्सी देखिएको उनले जानकारी दिए।

भोला रिजाल प्रोडक्सन र सुमन गिरी प्रोडक्सनको प्रस्तुतिमा बनेको चलचित्रमा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सञ्जोग रसाइली, सीतादेवी तिमिल्सिना र लक्ष्मीनाथ तिमिल्सिनालगायत कलाकारहरूको अभिनय रहेको छ।

डा. भोला रिजालको कथामा आधारित चलचित्रको पटकथा तथा संवाद डा. कपिल रिजाल, निश्चल कुँवर, नीरज नेपाल र गिरिराज घिमिरेले संयुक्त रूपमा तयार पारेका हुन्। घर, परिवार, सम्बन्ध र आत्मीयताको भावलाई केन्द्रमा राखिएको चलचित्रलाई रिच इन्टरटेनमेन्ट, एप्पल इन्टरटेनमेन्ट र एफडी कम्पनीले देशभर वितरण गरिरहेका छन्।