चलचित्रको ट्यागलाइन ‘कोही जित्छन्, कोही हार्छन्, कोही बादशाह बन्छन्’ राखिएको छ, जसले कथाको मूल भावलाई प्रतिबिम्बित गर्ने निर्माण पक्षको विश्वास छ।

चलचित्रका कार्यकारी निर्माता सुदीप्ता, लाइन प्रोड्युसर एलोन गुरुङ र प्रोजेक्ट सुपरभाइजर सुपथ श्रेष्ठ हुन्। नरेन्द्र मैनालीले छायांकन गर्ने चलचित्रमा संगीत निकेश कार्की र रोमन बज्राचार्य, सम्पादन सुनिल शिवभक्ति तथा स्टाइलिङ आशिम रानाभाटको रहनेछ।

कार्यकारी निर्माता सुदीप्ताले ‘एक्का मिस्सी बादशाह’ आफ्नो लागि विशेष परियोजना भएको बताउँदै कार्यकारी निर्माताको रूपमा नेपाली चलचित्र क्षेत्रमा नयाँ यात्रा सुरु गर्न लागेको उल्लेख गरिन्।

निर्माण टिमले चलचित्रका लागि ‘क्रिश’ र ‘अर्जुन’ नामका दुई मुख्य पुरुष पात्रको खोजी भइरहेको जनाएको छ। ती भूमिकाका लागि खुला अडिसन आह्वान गरिएको छ भने अन्य कलाकार र थप विवरण आगामी दिनमा सार्वजनिक गरिने निर्माण पक्षले जनाएको छ।

‘एक्का मिस्सी बादशाह’को छायांकन आगामी फागुन महिनाबाट सुरु गर्ने तयारी गरिएको छ।