काठमाडौं । वरिष्ठ कलाकार मदनकृष्ण श्रेष्ठको जीवनमा आधारित बायोपिक चलचित्र ‘म मदनकृष्ण’मा अभिनेत्री वर्षा राउत अनुबन्ध भएकी छन्। निर्माण पक्षले उनलाई हरिवंश आचार्यकी श्रीमती रमिला पाठकको भूमिकाका लागि अनुबन्ध गरेको हो।
चलचित्रमा हरिवंश आचार्यको भूमिकामा अभिनेता अरुण क्षेत्रीले अभिनय गर्दैछन्। अब वर्षा र अरुण पहिलोपटक जोडीका रूपमा पर्दामा देखिने भएका छन्।
निर्देशक मिलन चाम्सका अनुसार वर्षालाई अरुणको अपोजिटमा अनुबन्ध गरिएको हो। “वर्षाले हरिवंश आचार्यकी श्रीमती रमिला पाठकको भूमिका निर्वाह गर्नुहुनेछ,” उनले बताए।
हरिवंश आचार्यको जीवनमा आधारित आगामी बायोपिकमा समेत अरुणले मुख्य भूमिका निर्वाह गर्ने भएकाले वर्षा उक्त चलचित्रमा पनि रमिला पाठककै भूमिकामा देखिने निर्माण पक्षले जनाएको छ।
यसअघि वर्षा राउत अभिनीत चलचित्र ‘मालती मंगले’ प्रदर्शनमा आएको थियो, जसमा उनको अभिनयको प्रशंसा भएको थियो।
मदनकृष्ण श्रेष्ठको बाल्यकालदेखि सरकारी जागिरे जीवन, हरिवंश आचार्यसँगको सहकार्य, अन्तरजातीय विवाहलगायत जीवनका महत्वपूर्ण घटना र संघर्षलाई समेटेर ‘म मदनकृष्ण’ निर्माण हुन लागेको हो।
चलचित्रमा मदनकृष्ण श्रेष्ठको भूमिकामा अभिनेता महेश त्रिपाठी देखिनेछन् भने उनकी श्रीमती यशोदाको भूमिकामा केकी अधिकारी रहनेछिन्।
चलचित्रमा राजाराम पौडेल, किरण केसी, रुषा न्यौपाने, यमन श्रेष्ठ र देशभक्त खनाललगायत कलाकारको पनि अभिनय रहनेछ।
मिलन चाम्सले निर्देशन गर्ने यो बायोपिक भिन्टेज मोसन पिक्चर्सको प्रस्तुतिमा निर्माण हुनेछ। चलचित्रका निर्माता राजकुमार श्रेष्ठ हुन्। निर्देशक चाम्सले यसअघि राष्ट्रिय फुटबल टोलीकी गोलरक्षक तथा कप्तान अञ्जिला तुम्बाप्पेको जीवनमा आधारित चलचित्र ‘अञ्जिला’ निर्देशन गरेका थिए।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.