यसै गरी मन्त्रीपरिषद् बैठकले भारतमा आयोजना हुने सम्बन्धित क्षेत्रीय बैठकमा गृह मन्त्रालयका सहसचिवको नेतृत्वमा नेपाली प्रतिनिधिमण्डललाई सहभागी हुन स्वीकृति प्रदान गरेको छ । यस्तै नेपालमा एसियाली विपत् पूर्वतयारी केन्द्रको उपकेन्द्र स्थापना गर्नसमेत मन्त्रीपरिषद्ले स्वीकृति दिएको छ ।

मन्त्रीपरिषद् बैठकले संयुक्त राज्य अमेरिकाको न्युयोर्कमा आयोजना हुने संयुक्त राष्ट्रसङ्घको ८१ औँ महासभामा सहभागी हुन परराष्ट्रमन्त्रीको नेतृत्वमा नेपाली प्रतिनिधिमण्डल पठाउन स्वीकृति दिएको छ । महासभामा नेपालको सहभागिता, नेपालको राष्ट्रिय हित तथा अन्तर्राष्ट्रिय मञ्चमा नेपालको धारणा प्रस्तुत गर्न नेपाली प्रतिनिधिमण्डल सहभागी हुने छ ।

साउदीसँग द्विपक्षीय हवाई सेवा सम्झौता 

नेपाल सरकार र साउदी अरेबियाबिच द्विपक्षीय हवाई सेवा सम्झौता गर्न सरकारले स्वीकृति प्रदान गरेको छ । मन्त्रीपरिषद्को यो निर्णयसँगै नेपाल र साउदी अरेबियाबिच हवाई सेवा विस्तार तथा नियमित उडान सञ्चालनका लागि आवश्यक द्विपक्षीय सम्झौताको प्रव्रिmया अघि बढ्ने छ । दुई देशबिच हवाई सम्पर्क विस्तार हुँदा नेपालबाट साउदी अरेबिया जाने तथा साउदीबाट नेपाल आउने यात्रुलाई सहज हुनुका साथै पर्यटन तथा आर्थिक गतिविधिमा समेत योगदान पुग्ने छ ।

मन्त्रीपरिषद् बैठकले भुक्तानी तथा फस्र्योट ऐन, २०७५ लाई संशोधन गर्न बनेको विधेयक सङ्घीय संसद्मा पेस गर्न स्वीकृति दिएको छ । त्यस्तै नागरिक लगानी कोष ऐन, २०४७ लाई संशोधन गर्न बनेको विधेयक पनि सङ्घीय संसद्मा पेस गर्न स्वीकृति प्रदान गरेको छ ।

बागमतीको प्रमुख सचिवमा भट्टराई 

बैठकले सहसचिव कमलप्रसाद भट्टराईलाई राजपत्राङ्कित विशिष्ट श्रेणीमा बढुवा गर्ने निर्णय गरेको छ । बढुवा हुनुभएका भट्टराईलाई बागमती प्रदेशको मुख्यमन्त्री तथा मन्त्रीपरिषद्को कार्यालयको प्रमुख सचिव पदमा पदस्थापन गर्ने निर्णयसमेत गरेको छ । यससँगै मन्त्रीपरिषद् बैठकले सफ्टवेयर विकास तथा सञ्चालन समिति (गठन) आदेश, २०८३ स्वीकृत गरेको छ ।